ایران سینماسی‌نین تانینمیش اویونچوسو هدیه تهرانی‌یه اؤلکه‌دن چیخیش قاداغاسی قویولوب.
آیریجا بو اویونچونون اینستاگرامداکی حسابی دا باغلانیب.
بوندان اؤنجه فوتوقرافچی ریحانه طراوتی طرفیندن، هدیه تهرانی‌یه عاید اولدوغو دئییلن بیر آچیقلاما یاییلمیشدی کی اوندا ایران ایسلام جمهورییتی‌نین گوونلیک قوروملاری طرفیندن خانیم تهرانی‌یه خبردارلیق ائدیلدیگی بیلدیریلمیشدی.
بو آچیقلامانین بیر حیصه‌‌‌سینده دئییلیردی: بیلین کی، من بو اینسانلارین لیدری دئییلم، حیاتینی ایتیرن اینسانلارین منیم و منیم کیمیلرین دعوتینه احتیاجی یوخدور.
هدیه تهرانی وورغولامیشدی: “بیز بیرلیکده اولاجاغیق و بیلین کی، منیم اینسانلارلا ایله‌تیشیم قورا بیله‌جه‌ییم تک یول کوچه‌دیر.”
۲۲ شهریورده تهراندا ارشاد دئوریه‌سی طرفیندن حبس ائدیلن ۲۲ یاشلی قادین مهسا امینی‌نین اؤلدورولمه‌سیندن سونرا ایران شهرلرینده عومومی اعتراض آکسییالاری کئچیریلیب و بیر چوخ صنعت آداملاری و ایدمانچیلار اعتراض آکسییاسی کئچیریب و یا اعتراضچیلارلا یان یانا اولدوقلارینی بیلدیریبلر.
عومومی میقیاسیندا کئچیریلن اعتراض آکسییالاریندا صنعتچیلرین و ایدمانچیلارین دسته‌ییندن سونرا اعتراضلاری هر هانسی شکیلده موشایعت ائدن صنعتچیلرله قارشی گوونلیک تدبیرلری داوام ائدیر.
#عومومی_اعتراضلار #هدیه_تهرانی
