گؤنئی آزربایجانلی قادین، توپلومسال جینسیت یوکلرینی بوتون ایلیکلری ایله یاشاییر
تورك قادینلارلار مرکزی مخاطیبی طرفیندن گؤندریلن ویدئو
گؤنئی آزربایجانلی قادین، توپلومسال جینسیت یوکلرینی بوتون ایلیکلری ایله یاشاییر. اودا عینی مرکزده کی باجیلارینا تای قادینلیق آدینا وورولموش زنجیرلریندن قورتولماق آدینا، حاقلارینی باغیرماق ایسته ییر. آنجاق اونلارا قاووشماق اوچون تورک هوییتینی فدا ائتمه لیدیر چونکو فارس شوونیسمی اونون تورکلویونو قبوللانمیر.
بونا قارشی اؤز وطنینده آزادلیق حرکتینه قاتیلیر و اؤزگورلوک آرزیسی ایله اؤزونو “میللتچی” آدلاندیریر. آنجاق گل گؤرکی آزربایجان میللی حرکتینده ده اؤزونه بیر یئر تاپا بیلمیر، قادین یئنه یوخدور.
بوگون آزربایجان میللی حرکتینده بیز قادینلارین معروض قالدیغی آیری سئچکیلیک ، ماللا ذهنیتیندن چوخدا اوزاق دئییل. آزادلیقدان دم ووران قارداشلاریمیزین، قونو قادین آزادلیغی اولدوغو زامان سس سیز قالمالاری، اؤزلرینی کنارا چکمه لری وحتی قارشی دورمالاری بیزلری دریندن اینجیدیر.
سیزدن سوروشماق ایسته ییرم؛ بو گونلرده شهرلریمیزده وئریلن شعارلاردا تکجه بیر ” قادین” کلمه سی ائشیدیرسیز؟
آزربایجان میللی حرکتی اوچون قادین حاقلارینین اؤنمی نه دیر؟ یادا بیر اؤنمی وارمی؟
میللتچی قارداشلاریم “میللت”ین ایچینده قادینی هاردا گؤرور؟ آشپزخانادا ایگید اَری اوچون یئمک پیشیررکن یوخسا ساواش میدانیندا می؟
من بیر قادین اولاراق، بندلریمین ایچه ریسینده سیخیشتیریلیب بوغولاجاقسام ، عزیز قارداشیم “میللی حکومت ” قورولسا نه اولار؟منه نه فرق ائله ییر؟ منی یئنه ائوده اوتورماغا ایته له دینیز.
وئریلن فراخوان لاردا بیر دفعه “قادین” و “اؤزگورلوک” کلمه سینی یان-یانا گؤرمک ایسته دیم آنجاق گؤردویوم اودورکی ادعالارین عکسینه قادین دیره نیشی آغیر گلیر.
قادین سوسیال، اکونومیک ، سیاسال، یاسالاردا و کولتوروموزده ، کیشی ایله مگر بیر کفه ده دیرکی “قادین-کیشی ال-اله ” دئیه بیر جمله قورولور؟ قارداشیم منیم الیم سنین اولدوغون یئره یئتیشمیر، من چوخ داها آشاغیلاردایام.
“آزربایجان قیزلاری گؤیلرین اولدوزلاری” بیزیم هانسی مطالبه میزی دیله گتیریر؟ بوگون قادینین وئردییی ساواش، اولدوزا ، چیچه گه ، قیزیلا …اوخشادیلماق اوچون دئییل، اینسانی حاقلاری و ائشیتلیک (برابری) اوچوندور. حجاب اجباریه قارشی وئریلن موباریزه ده بونون بیر سمبلودور.
اوزون سؤزون قیساسی بونو دئمه لی یم کی قادینلار بیر آزینلیق دئییل، بلکه بو توپلومون یاریسیدیر. اگر خیاوانلاریمیزدا هر بئش کیشیه بیر قادینی گؤروروک، بونون سببینی اوتوروب دوشونمه لییک؛ قادینلار هاردادی؟ نه ایش گؤرور؟
آزرباجان میللی حرکتینین بیر طرفی آخساییر چونکو بو حرکت ده آتاارکیل و مرد سالار سیستمین حاکیم اولدوغو ائله بو توپلومدان چیخیر و بیر آزادلیق حرکتی اولاراق قادینا اولان ذهنیتینی دَییشتیرمک اوچون چالیشمالیدیر. سون اعتراضلارا اولان توتومونا باخیلاندا، آزربایجان میللی حرکتی فمنیستی دوشونجه دن یوخسوندور و بوقونودا چاغداش بیر باخیش آچیسی قازانمادیقجا، قادینلاری اوزاق سالیر و الدن وئریر.
سون سورو اولاراق ؛ قادین ندن اولمالیدیر؟ بونو جوابلاماق اوچون ایرانداکی سون اعتراضلاری، او بیری لری ایله قیاسلاماق یئترلیدیر؛ قادینسیز دئوریم دوشونولمز، قادین آزاد اولمادان ، آزربایجان آزاد اولماز، قادینین سسی باستیریلدیقجا، حاقلاری و موباریزه سی گؤرمزدن گلیندیکجه، اولدوغوموز یئیرده قالاریق ، قاباغا آتدیم آتماغیمیز ایمکانسیز اولار.
گؤنئی آزربایجانلی بیر قادین اولاراق دانیشیرام و سؤزوم بوتون آزربایجان میللی حرکتی منسوب لارینا دیر؛ اؤزگورقادین ، اؤزگور آزربایجان دئیه رک بو یؤن ده کی اولوملو آتدیملارینیزی گؤزله ییرم. ساغ اولون.
