شَهَرین بیر گونو منیم گؤزومدن :«سحرخیاوی»
دان یئری گؤیریر. گونش یاواش- یاواش داغلارین دالیندان چیخماق ایسته‌ییر. شَهَر آغیر یوخودان آییلان آداملار کیمی گَرنَشیر. دامارلارینی سیندیریر و یاشامین یئنی بیر قالابالیق گونونو یاشاماغا حاضیرلاشیر.
ایلک منه آددیم قویانلار بلدیه‌لر اولور. اونلار یولاقلاری سوپوروب، زیبیل‌لری گؤتوروب، بعضن ده اللرینده کی بئلین اوجویلا، سو یولونا زیبیل تؤکنلره لعنت اوخویا- اوخویا آرخلاری تمیزله‌ییرلر.
اونلاردان سونرا ایش آختاران فهله‌لر، هره‌سی بیر توربادا ایش پالتاری اللرینده مئیدانا ییغیشیرلار.
ایش صاحیبلری چوخلوق ماشینلا فهله آپارماغا گلیرلر. هر ماشین گلدیکجه اونلار فهله شیغییب،”ارباب منی… منی آپار”– دئییرلر.
اربابلار مال آلان کیمی موشتری گؤزو ایله فهله‌لرین ائنینی- اوزونونو اؤلچوب، ان گنجینی، ان جانلیسینی سئچیرلر.
گون یاییلاندا یئرده قالانلاری سویو سوزولموش، الی بوش، مٵیوس مئیداندان قاییدیرلار.
شَهَر اویاندیغجا توکانچیلار توکانلارینی آچیرلار. چؤره‌ک خانالارین قاباغی قالابالیقلاشیر.
بیرآزدان سونرا آل- وئر قیزیشیر. بازارچیلار یالان آندلاردان ایچیب موشتریله نئچه برابر قیمته جینس ساتیرلار. کیمیسی آلیر، کیمیسی پولو اولمازکن یالنیز حسرتله باخیر، کئچیر.
بیر اوشاق یوخسوللوغو دوشونمه‌یرکن آناسیندان نوبار میوه ایسته‌ییب اونو هامینین قاباغیندا شرمنده ائدیر. آناسی سورویورسه ده اوشاق میوه توکانلاری قاباغیندا آیاق دیره‌ییر. بیر چوخونون کارتی چکیلنده” موجودی کافی نیست” یازیر.
ایکی ماشین توققوشور، سوروجولر ماشیندان ائنیب، یاخالاشیب، هر بیریسی باشقاسینی سوچلو بیلرکن یامانلاییر. اونلاری آییراندان چوخ، موبایل ایله فیلیم چکن‌لر اولور!!
بیر دَلی اؤلو اعلامیه‌لرینه باخارکن، اللرینی اووشدوروب، “ماشاللاه…نه چوخالیبلار. حالوا یئیه‌جم”– دئییر.
بیر قادین پاساژین ناساز پیلله‌لریندن هرله‌نیر. یانیندا کی قیز اوشاغی شاشقینجا گولَن جماعته باخیر!
بیرینین پیادا یولونون چالا- چوخوروندا آیاغی بورخولور، حیرصلی” بو خارابادا ائششک ییخیلسا دیشی سینار”– دئییر.
بیر قوجا کیشی‌نین آیاغی استاندارد اولمایان دمیر کؤرپونون آراسینا گیریر. الینده آلدیغی یئرآلما- سوغان یئره توکولوب، پرن- پرن اولور. بیری آتش‌نشانی‌یه خبر وئرین دئییر. جماعت بیر شکیل قیچینی دمیرلرین آراسیندان چیخاریرلار. آمما سانکی قیچی سینیب، دوختورلوق اولور...
الینده ایکی اوچ بسته ساققیز ساتان اوشاق گلیب-گئدنلرین اته‌ییندن آسلانیر،” عمی…. خالا…. نه اولار… نه اولار…. بونلاردان آلین…”.
اؤز یاشامینین دولانباجلاریندا فالینی اودوزان اوغلانجیق، اؤزگه‌لره فال ساتیر…
آداملارین پولو یوخدو دییه، باشماق آلا بیلمیرلر، اودور کی پیادا یولوندا دالدالانان پینه‌چی عمی‌نین ایشی چوخدور!
شهرین بو قدر سینیق- سالخاغینی گؤرن مامور، یالنیز قادینلارین اؤرتوگونه پالتارینا گیر وئریر… گنجلری سوروتله‌ییب ماشینا باسیر…
هله یولداشلاریمدان ائشیدیرم اونلارین دا وضعی منه تایدی.
شهره سفر ائدنلر ده شهری اوزلرینه اوگئی سانیب، نعمتلریندن یئییب- ایچیب، طبیعتینده گزیب، آغاجلارینی سیندیریرلار، زیبیل‌لرینی طبیعته توکوب گئدیرلر، بیر سوزده دوز یئییب، دوز قابی سیندیریرلار!!
شافاق قارالینجا باشیم او قدر مصیب‌لر چکیرکی…
الیمدن هئچ زاد گلمه‌ین کیمی ناچار بیر کونجه قیسیلیرام، سیگاری سیگارا توتورام. اوزون ایللردیر خیسیلتیلی نفسیمی، اؤسکورکلی سسیمی کیمسه ائشیتمیر. کیمسه یاراما ملحم قویمور. یارالاریم او قدر درینله‌شیب اونلاردا شهرین ناکام آغاجلارینی اکمک اولار. گوجوم اولسایدی یارالاریمی موخبیرلرین کامئراسینا گوسترردیم بلکه اوتانمایانلار اوتانسین یارالاریمدان.
یادیما کیمسه‌لرین بو شهره باشچی یازیلدیقلاری گونلر دوشور.
بویالی، گولوشلو شکیل‌لر دیوارلاریمی بزه‌میشدی. یاغلی- بوغلو شعارلار هر طرفیمه یازیلمیشدی. هرکس اوزونو بو شهره ان اوره‌ک یاندیران گوستریردی. یولاقلار دا اونلارین تبلیغ کارتلاری ایله دولموشدو. یازیق بلدیه‌لر کار- کاغیذ سوپورمکدن یورولموشدولار.
کئشکه اَلیم اولسایدی او ریاکار گولوشلو شکیل‌لری جیریب زیبیل دولونا باساردیم. وئردیینیز وعده‌لر شَهَرین شاققیلداقلی دیزینده گؤرونور دییردیم.
آیاغیم اولسایدی توو دابانا بو قارغانمیش شَهردن قاچیب آرخاما بئله باخمازدیم.
حئییف کی نه الیم وار نه آیاغیم. یالنیز گؤروب کَرَم کیمی الیشیرام. حیرص یئییرم. سوندا بو حیرص الیمه ایش وئره‌جک بیلیرم. یا انفارکتدان اؤله‌جم ، یا ال قومباراسی کیمی یالانچیلارین اوزونه پارتلایاجام، پارچانلانمیش جنازه‌م الینیزین اوستونده قالاجاق!!
بیلدینیز من کیمم؟ سیزه غریبه دئییلم. من بو شَهَرین “آزادلیق” خیاوانی‌یام!!
“آز آدلیق” خیاوانی”!!
https://t.me/Adabiyyatsevanlar
