شهناز غلامی نین یادینی حؤرمتله آنیریق

قادین و میللتلر حقوقو اوزرینه آکتیویست، بلوگر، قزئته جی و اسکیدن ایران رژیمی دوستاقیندا سیاسی محبوس اولان شهناز غلامی، 9 ژوئیه 2022 (18 تیر-1401 ) تاریخینده بیلینمین بیر ندنله فرانسانین رن شهرینده دونیاسینی دئییشدیردی.
آزربایجانین تبریز شهرینده آنادان اولان شهناز غلامی، ایلک اولاراق 1368 ایلینده توتوقلاندی و بئش ایل بویونجا تبریز دوستاقیندا هرتورلو باسقی و وحشیجه شیکنجه ی معروض قالدی. ایکینجی دفعه بیرتوپلوجا اعتیراضا قاتیلدیغی اوچون رژیم قووه لری طرفیندن تنبیه اولماق آماجیلا بیر آی، تبریز دوستاقینین قادین قاتیل لر بندینده حبس ائدیلدی. بیر ایل سونرا ائله همان بنده 69 گون تکرار حبس ائدیلدی.
شهناز غلامی “ایران قادین قزئته جی لرینین” عضوو و “آذر زن” (آذر قادین) وبلاگین صاحابی ایدی. او یازدیغی جینسیت ائشیدسیزلیگی، میللی و ائتنیک حقوقو حاقدا ، بیر نئچه یازی اوزوندن اثر بیراخمیشدیر.
ایران دان چیخیشی و فرانسایا یئرلشمه سیله بیرگه، شهناز غلامی آوروپا محفیللرینده و اینسان حاقلاری قورولوشلاریندا حضور تاپاراق، ایران ایسلام رژیمی نین ائتدیگی جنایت لرین عینی بیر شاهیدی اولدو. او هر فرصتی دیرلندیررک ایران ایسلام رژیمی نین ائتدیگی جنایتلر و ظلملری ایفشا ائتدی. ائله کی زامانلا بو قونودا اؤزل بیر یئر و دیره صاحیب اولدو. او دوستاق دا تانیش اولدوغو سکینه آشتیانی نین پیس دورمو، چکدیگی آجیلار، و قورخونج دورومو حاقدا کی داشلاماق حؤکمونه محکوم اولموشدو، دانیشماغلا بیر چوخ سیاسی، خبری و اینسان حاقلاری قورولوشلارینین دیقتینی اؤزونه جذب ائتمه گی باشاردی.
شهناز غلامی سول و دموکرات قوروپلارینا اولان سمپاتلیغیندان دولایی، بیر چوخ سانال و قزئته جیلیک فعالیتلری یانیندا، اونلارین ایسلام رژیمینه قارشی ائتدیکلری اعتراضلارا قاتیلاراق، مظلوم و آیری سئچگی سیاستینده معروض قالان فرقلی طبقه لرین بیرلشمه سی اوچون هر تورلو فداکارلیق و چابایی اؤزوندن گؤستردی.
بیز تورک قادینلار مرکزی اولاراق شهناز غلامی نین یادینی عزیز توتاراق اونون یاشام سورجینده آزاد یاشاماق یولوندا اؤزوندن گؤستردیگی دیرنیش و چابالاری حؤرمتله آنیریق. بو عزیزین قوهوم دوست و تانیشلارینا صبیر دیله ییریک. یئری اوچماق روحو شاد اولسون.

تورک قادینلار مرکزی (اوجاقی)
15 ژوئیه 2022