قادینلاری گوجلندیرن ۸ یول
قادینلار و قیزلار یول‌وئریلمز سويیه‌‌ده آیری‌سئچکیلیک و زوراکیلیقلا اوزلشیرلر. بو ایسه یانلیش اولماقلا یاناشی، هم ده اونلارین جمعيیتده تام رول اویناماقلارینا مانع اولور. بو، بوتون دونیادا مدنيیتلرده، اقتصاديیاتلاردا، سیاسی و سوسیال اینستیتوتلاردا(اجتماعی نهادلار) هله ده بو گون درین کؤک سالمیش گئندر عدالتسیزلیگی(جنسیتی تبعیض) ایله باغلیدیر.
بیز ائله بیر دونیادا یاشاییریق کی، اورادا یوخسوللوق ایچینده یاشایان قادینلار دوغولاندان اؤلومونه قدر بؤیوک برابرسیزلیکلرله و عدالتسیزلیکلرله اوزلشیرلر. قادینلار دونیا اهالیسی‌نین یاریسینی تشکیل ائدیر و بونونلا بئله دونیا یوخسوللاری‌نین حیرت آمیز ۷۰% اونلاردان عبارتدیر. ضعیف تحصیلدن پیس قیدلانمایا(تغذیه)، ایش ایمکانلاری‌نین اولماماسینا و آشاغی معاشلی ایشلره قدر. چوخلاری تحصیللرینی و یا کارییرالارینی(حرفه) ترک ائتمه‌یه مجبور اولوبلار و بونا گؤره ده ساوادسیز بؤیویوبلر. تحصیل آلیب و کارییرا صاحبی اولان قادینلار دا اؤز ساحه‌‌‌لرینده چوخ حاقسیزلیقلارلا اوزلشیرلر. بو قبول‌ائدیلمز اولمالیدیر، لاکین چوخ یایغیندیر.
قادینلارین بو وضعيیتدن چیخماسینا بیز نه ائده بیلریک سؤالی جیددی سؤاللاردان بیریدیر. قادینلارین شخصی و پئشه‌کار(حرفه‌ی) اینکیشافی اوچون قادینلارین حیاتلارینی دستک‌له‌مک، گوجلندیرمک و یئنیدن قورماق مقصدی اولمالیدیر. بو، اونلارا دولانیشیق منبعی(درآمد منبعی) یاراتماغا ایمکان وئره‌جک حیات باجاریقلاری ایله تجهیز ائده‌جک. هدف قادینلاری دستک‌له‌مک و اونلارین اوغور قازانماق و اؤزلرینه گوونمک باجاریقلارینی اینکیشاف ائتدیرمک مقصدی داشیمالیدیر.
دونیادا قیزلارا، قادینلارا و آنالارا گوج وئرمه‌یین بیر چوخ یولو وار. بیز بوردا اونلارا دستک وئرمه‌یین ۸ یولونو گؤستره‌جییک. بو یوللار قادینلاری اجتماعی جهتدن گوجلندیرمکله یاناشی عینی زاماندا یوخسوللوغا قارشی موباریزه‌نی ده گوجلندیریر.
۱ – اؤزونوزه حؤرمت و گووه‌نی آرتیرین
قادینلارین چوخو کورسلار و درسلرده ایشتیراک ائتدیکدن سونرا اؤزلرینه حؤرمت و یا گوونلری‌نین اهميیتلی درجه‌‌‌ده آرتدیغینی بیلدیریرلر. قروپلار قارشیسیندا چیخیش ائتمک و فیکیرلرینی بؤلوشمکده داها راحت اولورلار. بو قادینلارین آیله‌‌‌لری، بیزنئسلری، کارییرلاری و یا پئشه‌لری اوچون ویزیون(چشم انداز) یاراتمالیدیر. قادینلار دوشوندوکلریندن داها چوخ شئیه نایل اولا بیله‌جکلرینه اینانمالیدیرلار. قادینلارین آلدیقلاری بیلیک و تشویق ایره‌لی‌له‌مکلری، اؤز گله‌جکلرینی قورماق و اوغورلاری اوچون چوخ واجیبدیر.
۲ – اجتماعی لیدرلر یارادین
بیر چوخ اینکیشاف ائتمکده اولان اؤلکلرده قادینلار نادیر حاللاردا اجتماعی لیدرلیک روللارینی اویناییرلار. قادینلارین کارییرلاری و بیزنئسلری بؤیودوکجه اونلار یئرلی لیدرلره چئوریلیرلر. اونلار لیدرلیک روللارینی اؤز اوزرلرینه گؤتورورلر و باشقالارینی تشویق ائتمه‌یه و اونلارا موشاویرلیک ائتمکله کؤمک ائدیرلر. قادینلار کورسلار قورورلار، کومیته‌لره قوشولور، گؤروشلره شرایط یارادیر، عدالتسیزلیکلره قارشی اؤز سسلرینی اوجالدیر و ایجمانین یاخشیلاشدیریلماسی پروقراملاری تشکیل ائدیرلر.
۳ – حیاتینیزداکی و یا اطرافینیزداکی قادینلارا دقت گؤستردیگینیزی حیس ائتدیرین
قادینلاری گوجلندیرمک عائله‌‌‌لریمیزدن، ایش یئرلریمیزدن و محله‌‌‌لریمیزدن باشلاییر. مثلا ائوده هر شئیی چاتدیرماغا چتینلیک چکن آنا اوچون قهوه سوزون و یا اؤز باجینیزا، قیزینیزا و یا آنانیزا اونلاری نه قدر قیمتلندیردیگینیزی سؤیله‌یین.
معنالی امکداشلیق واسطه‌‌‌سیله قادینلارا ایره‌لیلییشلرینده کؤمک ائده بیلریک و اونلارا سوسیال حیاتدا و اقتصاديیاتدا پوتئنسیاللارینی اوزه چیخارماقدا یاردیم ائده بیلریک. بو ایسه اونلارین مستقل اولمالارینا یاردیم ائده‌جک.
۴– ماليیه حللینی تامین ائدین
عنعنه‌‌وی بانک سیستملرینه چیخیشی اولمایان و یا مادی پروبلئمی اولان قادینلارا کیچیک مبلغده بورج وئرمک اویغوندور. بو میکرو کرئدیتلر(وام) وئریلدیکده، بو قادینلار، آنالار اؤز کیچیک بیزنئسلرینی قورا و یا تکمیل‌لشدیره، اؤزلرینی و عائله‌‌‌لرینی داها یاخشی تامین ائده بیلرلر. میکرو کرئدیتلر قادینلارا ماليیه مستقللیگی قازانماغا، گله‌جک اوچون قناعت ائتمه‌یه، اؤز هدفلری اوغروندا چالیشماغا، دوستلاری و عائله‌‌‌لری اوچون ایش یئرلری یاراتماغا و اوشاقلارینی مکتبه گؤندرمه‌یه کؤمک ائدیر. میثال اوچون « Mentors International » قادینلارا یاردیم فوندودور. اونون وئردیگی میکرو کرئدیتلری آلانلارین ۹۰ فایضی قادینلاردیر. دایمی کرئدیت مودللری‌نین اعیانه‌سی قادینلاری تکرار-تکرار دستکله‌مه‌یه کؤمک ائده‌جک.
۵ – سوسیال و ویرتوال(مجازی) شبکلر قورون
سوسیال شبکلر قورماقلا قادینلار داها چوخ دستک و ایجمالاریندا ديَیشیکلیک ائتمک اوچون داها گئنیش ایمکانلار الده ائدیرلر. قادینلار ویرتوال یا سوسیال اولاراق اؤز محصول، یارادیجی و فیکیرلرینی اورتایا قویدوقلاری زامان بؤیومک و وضعيیتلرینی یاخشیلاشدیرماق اوچون گوج و ایلهام آلیرلار. سوسیال حیاتدا اولوب و اؤزلرینه قارشی آلقیش، قایغی، دقت گؤردوکده گله‌جه‌یه اومیدلی اولورلار. بئله اولدوقدا، اؤیرندیکلری بیلیک، اینجه‌صعنت و بیزنئس باجاریقلارینی بؤلوشه‌رک، جمعيیتده‌کی دیگر قادینلارا کؤمک ائتمک اوچون داها چوخ ایلهام آلیرلار.
۶ – پئشه، ایش و اینجه‌صعنت باجاریقلارینی اؤیره‌دین
« UNICEF » ۲۰۲۱-جی ایل اوزره ایللیک حِساباتیندا تقریباً ۶۲ میلیون قیزین اساس تحصیلدن محروم ائدیلدیگینی بیلدیریر کی، بو دا اونلارین یوخسوللوق ایچینده یاشاماسی و یا گنج اؤلمه اِحتیمالینی آرتیریر. داواملی و فردی‌لشدیریلمیش، بیزنئس تعلیمی، اینجه‌صعنت کورسلاری، ایشه اساسلانان پئشه گواهینامه‌لری و اونلارین وضعيیتینه اویغون بلدچیلیک تامین ائدیلمه‌لیدیر. بو قادینلار «اوغورلو» بیزنئسله مشغول اولا بیله‌جکلرینی و یا تعلیملر سایه‌سینده داها یوکسک معاشلی و داها ثابت ایشلره وثیقه قازانا بیله‌جکلرینی آنلایاندا چوخ هیجانلانیرلار.
۷ – گلیرلری و امکلری آرتیرین
گلیرلری آرتدیقجا قادینلار گلیرلرینی دوزگون ایداره ائتمه‌گی اؤیرنمه‌لیدیلر. اونلار اؤز امانت حِسابلارینی آچماغا و شخصی بورجلاریندان قورتولماغا تشویق اولونمالیدیرلار. بئله‌لیکله اونلار اؤز حیاتلارینی ديَیشیر و یوخسوللوغون نسیل دؤوره‌سینی(چرخه) قیریرلار.
۸ – ساغلاملیغا تأثیر
پئشه و اینجه‌صعنت ساحه‌‌‌سینده بیر ایشه صاحب اولماق قادینلاری یوخسوللوقدان اوزاقلاشما شانسلارینی آرتیریر. بو ایسه اونلارین ساغلیقلارینا موثبت معنادا تأثیر گؤستریر.
پئشه‌سی و کارییراسی اولان بیر چوخ قادینلار ایندی اوشاقلارینی قیدا ديَرلری یوکسک اولان یئمکلرله قیدالاندیرماق اوچون ماليیه ایمکانلارینا مالیکدیرلر. ثابت گلیرله بو آنالار نینکی عائله‌‌‌لرینی دولاندیرا، هم ده اونلارا درمان و دوغوشدان اول قوللوق کیمی پروفیلاکتیک(پیشگیرانه) طیبی خیدمتلر گؤستره بیلرلر.
قایناق: Metadors International
ترجومه: اتک‌یازی ترجمه قروپو
