اورمو گؤلونه ایتحاف “سحر خیاوی”
دنیزلره خطاب
(اورمو گؤلونه ایتحاف)
سَرَنده ماوی گؤیلره کؤکسوزو،
یویاندا اوزونو سولاریزدا آی،
آتاندا اؤزونو قوجاغینیزا
چیلغینجا، دلیجه، جوشان چشمه-چای،
قاغایی اوچاندا سولارین اوسته
دوشَنده شکیلی آینا سویوزا،
دالاندا شاعیرلر درین فیکیره
باخیب اوج- بوجاقسیز ائنیز- بویوزا،
لپه‌لر چیلغینجا گلیب ساحیله
بیر اؤپوش گؤتوروب تئز تَلَسنده،
سحرلر، آخشاملار سینه‌‌نیز اوسته
سَرین مئه، نازلاما کیمی اسَنده،
گونَش دارایاندا قیزیل ساچینی،
سولاریز قیزیل‌لار رنگی چالاندا،
سیزده‌کی یویونموش گونَشین قیزی
گویده‌کی گونَشدن باج، تاج آلاندا،
سینه‌زده گزنده گَمیده ائل‌لر،
ال چالیب، اوخویوب، شنلیک ائدنده،
ساحیلده گزنده گنج آداقلیلار،
ال- اله، قول- قولا قومدا گئدنده،
اوشاقلار ییغاندا بالیق‌قولاغی،
سئوینجله اطرافا سو چیله‌ینده،
رنگ‌به‌رنگ اوچوردوب مین هاوا شاری
گولوش‌له آتالار شار پیله‌ینده،
اوچوردوب گؤیلره چرپلنگ‌لری،
اوزاغا چکیلنده باخیشلاری،
دوشَنده اوزوزه آزاد قوشلارین
اوچارکن دویغولو، خوش ناخیشلاری،
آخشام غوربتینده گئجه یاریسی
آداملار ییغشیب ائوه گئدنده،
باخیب اولدوزلارین سایریشماسینا
اؤزوزو لاپبادان تک حیسّ ائدنده،
یاد ائدین: بوردا دا دنیز وار ایدی،
دوزلاغا باتیبدیر خاطیره‌لری.
ساغالماز یارا تک، اوره‌ییمیزده،
قالیبدیر گؤینه‌ین، کؤزه‌رن یئری…
#اورمو_گولو_جان_وئریر
#اورمو_گؤلۆم_قوروماسین
#اورمو_سسی
#اورمو_زنجان_اردبیل_بو_سس_تبریزدن_گلیر
