«ثریا_خلیق_خیاوی» شعر_گئجه‌سی
کلمه چاتلاییردی
زوغوندان زیغا باتمیشدی مکان
باتلاق دولانیردی
شاعر اودوردو
شعر گئجه‌سی ایدی
ایلک سیرادا اوتورانلارسا: پالچیق تابلولاری
سؤزلریندن کسسک چیرتلاییردی
شعری تانیمایان
غزلدن دانیشیردی
بیری شاعر یوغوروردو
بیری زاپاس گزیردی
بیری چیینینده‌کی نیشانی جورلاییردی
باشقاسی « باجه شعر/الدین»ی وصف ائدیردی
ایلک سیرا زورنا چالیردی
اونونجو سیرادان قالخدی شعر
آپولو قاپینی آچدی
شاعر اؤزونو خیاوانا آتدی
آی گؤیده ایدی
تانری یئرده
شاعر آی سؤزجویونو الینه آلدی
تانری شاعری اوره‌یینه
آددیملادیلار
تانری سربست شعره باشلادی:
دونیا گئرچک شعرلرین اولاجاق
چیلله بیته جک، آز قالدی
سؤزلر،
تانرینین اوره‌یینده بیر سالخیم اوزوم اولدولار
شاعر، تانرینین اوره‌ییندن اؤپدو
شاعر تانریم!
اوزوم‌لری قورتار!
میکروفونلاری قورتار!
قانلاری قورتار!
شعرلریمده زورلا سانسور اولان سؤزلره حیات باغیشلا…
آی، اوزوم گیله‌لرین کائناتا سپدی
قان/آدلار!
چیلله چیخاجاق… آز قالدی
گؤز/لر!
کائنات…
سحرچاغی
شیروان‌دره‌سی
دیزه‌جن
شعره باتمیشدی….
