اوشاق ادبیاتی آزربایجان افسانه لری سؤیله ین:«صمد بهرنگی – بهروز دهقانی» چئویرن:«منیژه جم‌نژاد»
سن ده صبیر قولچاغیم، منده صبیر قولچاغیم
بیری واریدی، بیری یوخودو. بیر ار آرواد واریدی، فاطمه خانیم آدیندا بیر قیزلاری واریدی. فاطمه خانیم هر یول چشمه باشینا، سو دولدورماغا گئدنده، چشمه دن بیر سس دئیردی: فاطمه خانیم وای سنه، وای منه! فاطمه خانیمین داها تابی قورتولدو، حال قضیه نی آناسینا دئدی. آنا آتایا دئدی: کیشی، داها الیمیز قولوموز باغلی اوتوروب باخا بیلمریک. قیزیمیز الدن گئدیر. گل آیری بیر یئره گئده ک. وار یوخلارینی ساتیب، باشقا بیر یئره گئتمک اوچون یولا دو٘شدلر. گو٘ن باتان چاغی بیر باغا یئتیشدیلر. او٘چو ده سوسوز ایدیلر. دووارین چاتیندان باخیب گؤردولر باغدا دوم دورو بیر سو آخیر، آتا باغین قاپیسینی ترپتدی، آچیلمادی. آنا زورلادی، آچیلمادی. سونوندا فاطمه خانیم الینی قاپیا ووردو، آچیلدی. فاطمه خانیم ایچری گیردی، آرخاسیندا قاپی باغلاندی. آتا آنا دووارین اوتاییندا قالدیلار، فاطمه خانیم بو تاییندا. هرنه ائتدیلر قاپی آچیلمادی. آغلییب زاریدیلار، فایداسیز ایدی. دیبده آتا آنا دئدیلر: بودا بیزیم آلینیمیزین یازیسی ایمیش! گئتدیک، آللاه آمانیندا! قویوب گئتدیلر. بویاندان فاطمه خانیم چوخ آغلایاندان سونرا ، دوروب او٘زونه سو ووروب، باغی دولانماغا باشلادی. بیردن گؤزو بیر اوتاغا دو٘شدو. تلسیک اؤزونو یئتیردی. اوتاقدا بیر جوان اوزانمیشدی. گؤوده سی ایینه سانجاق لا دولویدو. کؤکسونده بیر لوحه ده یازیلمیشدی: کیمسه بو لوحه نی اوخویوب ایینه سانجاقلاری چیخاریرسا قیرخ گو٘نون باشی بو جوان دیریلر. فاطمه خانیم جوانین یانیندا اوتوروب، دعا اوخویوب، ایینه سانجاق لاری چیخارماغا باشلادی. گئجه به گو٘ندوز دعا اوخویوب، آغلییب، سانجاقلاری چیخاریردی. اوتوز دوقوزونجو گو٘ن، کوچه دن بیر سس گلدی. بیر قاراواش ساتیردیلار. فاطمه خانیم اؤز اؤزونه دئدی: جوان دوروب اوتاغی بئله تؤر توکونتولو گؤرسه، مندن آجیغی گلر. گئدیم قاراواشی آلیم، الیمین آلتیندا اولسون، ائوی ییر یغیش ائدیم. بو نیت له دوروب داما چیخدی. پول کیسه سین آشاغی آتدی، قاراواشی آلیب چکدی او٘سته. دئدی: من گئدیرم ال او٘زومو یویام. من گلینجه ده سن ائوی تمیزله. قاراواش اوتاغا گیرنده جوانی گؤرونجه نه وار نه یوخو آنلادی. جوانین یانیندا اوتوروب تئز – تئز ایینه لری چیخاردی. قورتولونجا جوان آسقیریب دوروب اوتوردو. قاراواشی باشی او٘سته گؤروب دئدی: سنه من قوربان اولوم. سن قیرخ گو٘ندو منیم باشیم او٘سته اوتوروب بدنیمین ایینه سانجاق لارین چکیرسن؟ قاراواش دئدی: هه، به نمنه؟ جوان قاراواش لا ائولندی. بویاندان فاطمه خانیم باش گؤزونو یویوب، تمیز له ییب، ایینه سانجاق لارین قالانینی چیخارماغا اوتاغا گلدی. گؤردو جوان دوروب قاراواش لا خوش خوش دانیشیر. بیلدی ایش ایشدن کئچیب. دا ال آیاقلارینا دولاشمادی. او گو٘ندن قاراواش اولدو ائوین خانیمی، فاطمه خانیم دا اولدو قوللوقچو. نئچه گو٘ن دن سونرا اوغلان دئدی: گئدیرم شهره. او٘ره‌ییز نه ایستیر آلیم سیزه؟ قاراواش سو٘زدوره- سو٘زدوره، ناز لا دئدی: منه بیر الماس او٘زوک آل. اوغلان فاطمه خانیما دئدی: سنه نمنه؟ فاطمه خانیم دئدی: منه بیر صبیر قولچاغی. اوغلان شهره گئتدی ایشلرین گؤردو، خانیمینا الماس او٘زوک آلدی، صبیر قولچاغی آلماغا گئتدی. ساتان دئدی: داداش، بو قولچاغی ایسته ین، دردلی آدامدی. گرک بیر یئرده گیزلنیب سوزلرینه قولاغ آسیب دردی نه دیر بیلسن. سونرا گرک چیخیب قولچاق پاتلاسین دئیه اونو توتاسان، یوخسا او اؤزو پاتلایاجاق. اوغلان قولچاغی گتیریب فاطمه خانما وئردی. گئجه فاطمه خانیم قولچاغی گؤتوروب اوتاغینا گئتدی. اوغلان دا یاواش گئدیب پرده دالیندا گیزلندی. فاطمه خانیم قولچاغی قاباغینا قویوب دانیشیب درد لشمه یه باشلادی:
بیری واریدی بیری یوخودو. بیر فاطمه خانیم واریدی. آتا آناسینین بیری بیر داناسی ایدی. سنده صبیر قولجاغیم، منده صبیر قولچاغیم!
آردی وار…
