اورمودا سؤنمه‌ین اوجاق: تحکیه ادبی درنه‌یی
🔸 گونئی آذربایجاندا تحکیه ادبی درنه‌یی ۱۱ ایلدن چوخدور کی ادبیات ساحه‌سینده اؤز فعالیتینی داوام ائتدیریر. بو درنک اورمو شهرینده هر هفته اوتوروم‌لار قورور، آذربایجان و دونیا ادبیاتیندان تانینمیش اثرلری اورتایا قویوب، اونلارین حاقیندا اطرافلی دوشونمه‌یه چالیشیر.
🔸 تحکیه درنه‌یینده موعاصیر نثره دیقّت یئتیریلیر. ائله کی بعضا بیر یازیچی‌نین اثری حاقیندا ۱۰ آردیجیل موذاکیره کئچیریلیر. عینی حالدا بو درنک دفعه‌لرله پوئزییا و یا نثر رئداکته‌سی کورس‌لاری ده قوروب. درنه‌یین رهبری محمد صبحدل-ین بیلدیردیگینه گؤره تحکیه‌نین یئنی دؤور اوتوروم‌لارینین خرجی ایرشاد ایداره‌سی‌نین عؤهده‌لیگینده‌دیر و ماراقلی شخص‌لر پولسوز شکیلده اوتوروم‌لاردا ایشتیراک ائده بیلرلر.
🔸 یازیچی و نشریاتچی محمد صبحدل هم ده بیلدیریب کی ایجلاس‌لارین بودجه‌سی دؤولتین سوسیال ضررلر(آسیب‌های اجتماعی) لاییحه‌سیندن آیریلدیغی اوچون، اوتوروم‌لارین اساس مؤوضوعسو ادبیات سوسیولوگییاسی اوزره اولاجاق.
🔸 بوتا نشریاتی‌نین صاحیبلیگی، بوتا ژورنالی‌نین صاحیبلیگی و مودیرلیگی و تحکیه درنه‌یی‌نین رهبرلیگی محمد صبحدلین گونئی آذربایجانداکی ادبی فعالیت‌لریندندیر. بوتا نشریاتی اوزون ایل‌لردیر کی موعاصیر نثر نومونه‌لرینی، رومان و حئکایه‌لری عرب الیفباسی ایله آذربایجان تورکجه‌سینده نشر ائتدیریب. حاضیردا بوتا نشریاتی، بوتا ژورنالی و تحکیه ادبی درنه‌یی بؤیوک بیر کومپلئکس کیمی اورمو شهرینده اؤز فعالیتینی داوام ائتدیریر.
