بو ایل دنیا قادینلار گونو محاربه نین دهشتلی رزونانسی ایله قاریشدی! تورک قادینلار مرکزی
بو ایل، دونیا قادین گونونو (مارتین سگگیزینی) قارشیلاماغا بیر حالدا گئدیریک کی، اون گوندن چوخدور بشرییت تاریخینده اولان باشقا دؤیوشلره تای، آوروپانین اورک باشیندا، ائولر ییخان قانلی دؤیوش، اینسانلاری، کیشی، قادین اوشاقلاری بئله، اؤلومه سوروتلویوب، اودور. همه‌شه اولدوغو کیمی بو دفعه‌ده محاریبه‌نین اصلی قوربانلاری قادینلارلا اوشاقلاردیر.
سومورگه‌چیلیق و سومورمه‌چیلرله قورتولوش موباریزه لرده ، کیشلرله چیین چینه ائولریندن، وطنلرینلرین دیفاع ائلینلر قادینلاراولوبلار. یئنه همانلار، جیبهه آرخاسیندا ، دؤیوشچولره لازیم اولان زاوتلاردان، اکین یئرلریندن، انرژی مرکزلرینده یئر توتوب ، دورمادان چالیشیب و دایانیبلار. بو دورومدا، قادینلار تک باشلارینا کیشلرین یئرین دولدوروبلار.
اونلار عین‌حالدا، خسته خانالاردا، قان ترین ایچینده، یارالارا مرهم قویوب، قوجاقلاریندا گؤز یاشلاری تؤکنلری اوودوبلار. بو دا یئتمه میش، همان بو قادینلار، اوشاقلارا گؤره ائوی ایستیدیبلر، آنا اولوب- آنا قالیبلار، آتانین یئرینیده ، دولدوروبلار. بو گونلر، ساواشین اودو، تانیش واسکی باهانالارلا، روسیه طرفیندن اوکراینین سوچسوز، دیفاعسیز خالقینی یاندیرماقدادیر. باهانالارین بیری بو: ” باغیمسیز قونشوموزون دونیایلا علاقه‌لری بیزی نیگران ائدیر” … بلی، بوندن قونشونون ائولرینی باشلارینا اوچوتماغا یئترلی میش!
اؤلکه‌میزین داخیلینده بیزه گلدیگیمیزده، وطنداشلارین، بو خالقین یاریسینی اولوشدوران قادینلارین، سایسیز سورونلارینین هئچ بیری هله‌ده چؤزولمه‌یب کی هئچ، اوسته‌لیک هرایل قادی‌نین ال- آیاغینا ورولان قاندال‌لارین سایی چوخالماقدادیر. هله ده بو اؤلکه‌ده، بیر کیشی حاقلیدیر، 17 یاشیندا اوشاق قادی‌نینین باشینی، قارداشی‌نین یاردیمیلا کسیب، خیاوانلاردا دولاندیرسین! نیه؟ چون شریعت و قانون بو ایزنی اونا وئریبدیر. بئله بیر ناموس قاتیلی‌نین جزاسی نه اؤلومدور ، نه عؤمور بویو دوستاق! قاتیل بونو بیلیر کی، قانون اونو، قادی‌نین صاحابی بیلیر. تجربه‌لره اساسلاناراق دوشونور: دیبی بودو، نئچه ایل توتولوب سونرا عفو توتوب چیخارام! نیه؟ چون قتل، ناموس اوستونده‌یدیر.
هله‌ده، بو اؤلکه‌ده قادینلار تکجه جنسی آیری سئچگی و تبعیضلره یوخ، حتی اؤز میللی و اینسانی حاقلاری، یانی آنا دیللریندن محرومدورلار کی میللتلر تشکیلاتی و یونسکونون دئدیگینه گؤره، مکتبدن قاچماق و ساوادسیزلیغین بؤیوک عامیلریندندیر. اوشاقلارین ایلک ائیتیم چاغلاریندا کی دویغولاری، بئیین چالیشمالاری آنا دیل لرینده اولار، بو اوشاقلار بو نعمتدن محرومدورلار.
قانون شکلینه دؤنوشن، قادینلارین علیهینه اولان، یئنی ماده لرین بیری ایسه، “جمعیتی جاوانلاتماق ” عونواندا ، اوشاق دوغوب – دوغماماق حاققینی قادینلار و عائله‌لردن آلیبدیر. بئله‌لیکه حامیله‌لیگی اؤنلمک آراجلاری و درمانلارینی یغیشدیریبلار. بو ایش، بیرچوخ یولوخوجو و جینسی خسته‌لیکلره سبب اولوبدور. دیگر طرفدن ایسه، دوغوشدان اؤنجه ژنتیکی آنالیزلری، اوشاغین انگللی اولوب اولماماغینی تعیین ائتمگه، قادینلارا قدغن ائدیبلر.
بو توپلوموم یاریسی اولان قادینلار ، جینسی ظولومدن( گئییم، بوشانما وس… عیبارتدیر)، نئچه قات باشقا ظولوملر، میللی، دینسل و صینیفسل، ظولوملره ده، معروض قالیرلار.
آنجاق هله‌ده، سیرانین باشیندا گئدن بو قادینلاردیر. معللیملرین، فهله‌لرین، امکچیلرین ائیلملرینده، تعطیل‌لرینده یئنه‌ده سیرانین باشیندا اولانلار قادینلاردیرلا. اونلار،توتوقلانیرلار، دوستاقدا قالیرلار، بو یولدا چوخلو زیانلار چکیرلر، اوزون حبسلرده قالیرلار!
بیز، تورک قادینلار اوجاغیندا، مارتین سگگیزی، دونیا قادینلار گونونو دونیانین بوتون قادینلارینا اؤزللیکله تورک قادینلارینا تبریک دئییریک. بونا اینانیریق کی، ایراندا موختلیف میللیتلردن اولان قادینلار، تکجه، باشقا قادینلارلا ایش بیرلیگی‌ایله، اورتاق هدفلرله، قادین علیهینه اولان قانونلار، یا خود نئچه قات باشقا ظولملره قارشی قورتولوش موباریزه آپارا بیلرلر.
یاشاسین، ایراندا قادین علیهینه قانونلارلا موباریزه‌لر
تورک قادینلار مرکزی
مارتین 5-2022
