بمپوردا ۱۷ یاشلی اوشاق نیکاحلی قیز اؤزونو یاندیریب
سیستان و بلوچیستان ایالتی‌نین بمپور شهرینده حیات یولداشی طرفیندن دؤیولن و شدته معروض قالان ۱۷ یاشلی اوشاق نیکاحلی قیز اؤزونو یاندیراراق حیاتینا سون قویماق زوروندا قالیب.
بلوچ فعاللاری‌نین کامپانییاسی بو خبری آچیقلاییب و یازیب کی، بو یئنی‌یئتمه قیزین آدی «ف. مارندگانی»دیر و او، خاش شهری‌نین ایرندگان بؤلگه‌سی‌نین مارندگان کندیندن ایدی.
راپوردا بیلدیریلیر کی،”بو بلوچ قیز شدته معروض قالدیغی و عائله‌‌‌سی‌نین دستیی‌نین اولماماسی سببیندن اؤزونو یاندیریب.”
اؤتن هفته زهرا جاویدنیا آدلی ۱۸ یاشلی قادینین اؤزونو یاندیرماسی ایله باغلی بیلگیلی بیر قایناق ایران‌وایره دئییب: زهرا حیات یولداشی‌نین اونا ائتدیگی تضییق و شدته گؤره اینتیحار ائده‌رک حیاتینی ایتیردی.
تخمیناً بیر آی اؤنجه بلوچ فعاللاری‌نین کامپانییاسی سیستان و بلوچیستان ایالتینده ۱۶ یاشلی قیزین ۴۰ یاشلی حیات یولداشی طرفیندن شدته معروض قالما و دؤیولمه سونوجوندا اؤزونو یاندیرماسی و اؤلمه‌سی باره‌ده بیلگی وئرمیشدی.
بو ایللر ایچینده مدنی فعاللار اوشاق نیکاحینی قاداغان ائدن قانون قبول ائتمه‌یه چالیشسالار دا، ۱۳۹۷-جی ایلده اوشاق نیکاحینی قاداغان ائدن پلانا مجلیسین محکمه-حوقوق کمیسیونو قارشی چیخدی.
ایسلام جمهورییتی‌نین یئتکیلی اورقانلاری اوشاق دوغورماغی آرتیرماق اوچون اوشاقلارین، اؤزللیکله کیچیک یاشلی قیزلارین و یئنی‌یئتمه قیزلارین ائولندیریلمه‌سینی نینکی قاداغان ائتمیر، حتی تشویق ائدیر.
رسمی ایستاتیستیکایا گؤره، ۱۴۰۰-جو ایلین یازیندا ۱۰-۱۴ یاشلی قیزلارین نیکاحلانانلاری‌نین سایی اؤتن ایلین یازیندا عینی ایستاتیستیک گؤستریجیلرله موقایسه‌‌ده تخمیناً یوزده ۳۲ آرتاراق ۹ مین ۷۵۳ نیکاحا چاتیب.
