قادین جنایتی: بیر ارکک حمام‌دا حیات یولداشینی یاندیراراق اوُلدوردو
بیلگیلی بیر قایناغین ایران‌وایره وئردیگی بیلگیلره گؤره، سحر نوروزی آدلی گنج بیر قادین حیات یولداشی طرفیندن یاندیریلاراق قتله یئتیریب.
اونون سؤزلرینه گؤره، گنج قادین بیر آی خسته‌خانادا قالدیقدان سونرا آلدیغی خسارتلردن دونیاسینی ديیشیب.
سحر نوروزی ایکی اوشاق آناسی ایدی و بوندان اؤنجه حیات یولداشی طرفیندن عائله ایچی شدته معروض قالمیشدی.
بو باره‌ده بیلگیلی بیر قایناق ایران‌وایره بیلدیریب: سحرین حیات یولداشی نارکوتیک باغیملیسی‌دیر و اؤنجه‌لر اونون قولونو سیندیرمیشدی. سحر حیات یولداشی و ایکی اوشاغی ایله آتاسی‌نین ائوینین آلت قاتیندا یاشاییردی و حیات یولداشی اونلاری دایم تهدید ائتدیگی اوچون پولیسه شیکایت ائتمیشدیلر.
بو بیلگیلی شخصین سؤزلرینه گؤره، سحرین و عائله‌‌‌سی‌نین شیکایتینه یئترلی باخیلماماسی اونون حیات یولداشینین داها چوخ زوراکیلیغینا معروض قالماسینا سبب اولوب: او، داواملی اولاراق ائوی یاندیراجاغی ایله تهدید ائدیردی. بیر آی اؤنجه او، ائوه بیر لیتر بنزینله گیرمیشدی. اؤنجه اوشاقلاری ائودن چیخارمیشدی. صوبح واختی ایدی. او ائوه بِنزین تؤکرک یاندیریب و قاچمیشدی.
بیلگیلی شخص دئییر کی، قونشولار سحرین حیات یولداشینین بیر لیتر بِنزینله ائوه گیردیگی‌نین شاهیدی اولوبلار.
سحر آلوولاناندان سونرا گنج قادینین عائله‌‌‌سی اونو ملایر خسته‌خاناسینا آپاریب، لاکین کیفایت قدر ایمکان اولمادیغیندان سحر همدان خسته‌خاناسینا گؤندریلیب: همدان خسته‌خاناسی سحری قبول ائده بیلمه‌دی و او، تهرانا آپاریلدی. بیر آی ایچینده اوچدن چوخ عملیات کئچیردی، اما ایلک باشدان اونون ساغ قالما شانسی‌نین یوزده ۳۰ اولدوغو دئییلیردی.
سحر نوروزی ۲۵ گونلوک یانیق و چوخلو آغریلاردان سونرا نهایت حیاتینی ایتیردی.
ایران‌وایر ایله دانیشان بیلگیلی قایناغین سؤزلرینه گؤره، سحرین حیات یولداشی اؤنجه قاچیب، آنجاق ایندی حبسده‌دیر.
#ایران_خبرلری #قادینلار #قادین_جینایتی #قادین_حوقوقلاری
