آدی تورکجه اولان “هون تای”، دوغماسیندان اوچ ایل کئچدیگینه رغما، هله کیملیگی یوخدو
تورک قادینی- دوغو آزربایجان ایالتی جلفا شهرنین ثبت احوال اداره سی، “هون تایین ” دوغماسیندان اوچ ایل کئچدیگینه رغماً، تورکجه آدیندان اوُتورو کیملیگی وئریلمیر.
استان ایران وایر خبر آژانسی”نین گزارشینه گؤره: “هون تایین” آناسی ۲۳ آبان ۱۴۰۰ شمسی ایلینده اوُز اینستگرام صجیفه‌سینده آزربایجان تورکجه‌سیله یازیب: “بو گون هون‌تای اوچ یاشینی قوتاردی و بیز هله‌ده شناسنامه آلا بیلمه‌میشیک… اما بیز موباریزه‌ی دوام ائده‌جییک…”
وورقولامالییق کی؛ بو اول دفعه دییل‌کی، اوشاقلارا تورکجه آد قویولماسی اوچون ، ایران دوُولتی طرفیندن اونلارا کیملیک وئریلمیر . خاطیرلاتمالییق کی کئچن‌لرده ” آییل” آدیندا بیر اردبیللی اوشاقا کیملیک وئریلمه‌دیگی اوچون، آتاسی ثبت احوال اداره‌سینین قاباغیندا اعتراض ائدیب و بیر کامپانیا یولا سالمیشدی. بو اعتراض سرعتله سوسیال مئدیادا یاییلماسی‌ایله بیرگه بیر چوخ تورک آئیله، بو کامپانیایا سس وئریب اوُز تجربه‌لرینی پایلاشاراق، “آییلین” آتا-آناسینا قوشولموشدولار.
“آییل” آئیله‌سینین یانیندا، “آنار”، “سئوگی”، “یاغیش”، “آتاکان”، “اوغوز”، “تورک‌آی”، “تارکان” و “آننا” کیمی، تورکجه آدلاری اوشاقلارینا سئچن آئیله‌لر اعتراض ائدیب و اوشاقلارینا کیملیک آلامادیغلارینی دیله گتیرمیشدیلر.
بو کامپانیا ایله بیرگه، ایران‌دا یاشایان بیر چوخ عرب، بلوچ و کورد آئیله‌لرده بنزر تجربه لرینی و سیخینتیلارینی ویدئو چکرک دیله گتیریب، سوسیال مئدیادا پایلاشدیلار .
ایران قانونلارینا گوُره، آئیله‌لر ثبت احوال اداره‌سینده اولان لیسته‌ی گوُره اوشاقلارینا آد سئچمه‌لری گره‌کیر و بو لیسته دیشیندا اولان آدلارا کیملیک وئریلمیر. بیلینمه لیدیرکی عمومیت‌ده بو لیسته فارسجا، ایسیملردن تشکیل تاپماقدادیر .
