کوراوغلویلا کچل حمزه یازار:« صمد بهرنگی» – چئویرن:«منیژه جم‌نژاد»
سانکی حسن پاشا یوخودان آییلدی. دیسکینیب دئدی: یوخ جانیم، نه کوراوغلوسو. دئمک بیز ائله آخماقیق کی کوراوغلو گلیب بیزی ائششک یئرینه قویوب قیرآتی آپارا؟ کوراوغلو گئنه اوخوردو: بیزه مراد بَیلی دئیه‌رلر. مئیداندا ایگید کیمی دایانارام. اوجا داغلارین باشیندا خانلارین، شاهلارین کروانلارینین قاباغینی کسرم. داغلاردا های کوی سالارام. باغیریرسام، سربازلار شهریوی، قالاوی قویوب قاچارلار. حسن پاشا گؤردو خیرخیراسینا دک باشینا بؤرک کئچیب، ایش ایشدن کئچیب. دو٘نیا گؤزونده قارالدی، قورخودان تیتره دی. امر ائله دی تئز قالانین قاپلارین باغلاییب، کوراوغلونو توتسونلار . کوراوغلو گؤردو قالانین قاپی لارینین بیری باغلاندی. او٘زونو حسن پاشایا توتوب اوخودو: بیر خبرچی دن دویدوم کی قالانین بئش یولو وار، نعره چکسم، هامیسی آچیلار. بونو دئیب ایکینجی یولدان چیخماق ایسته دی. قوشون قاباغین آلدی، کوراوغلو شمشیرین چکدی، سو٘رویه قورد ووران کیمی اؤزونو قوشونا ووردو. باشلار خیار کوتویو کیمی یئره تؤکولوردولر، آما قوشون ائله چوخودو کی یول آچیلمیردی. کوراوغلو او٘چونجو یولدان گئتمه یه چالیشدی. اورادا اوقدر داش دان قومدان توکموشدولر کی آت یولونو تاپا بیلمیردی. کوراوغلو گئنه اؤزونو دوشمانین لشکرینه ووروب، اؤلونو اؤلو اوسته قالادی. قیرآت دا دیشی‌له پنجه سی له کوراوغلودان دالی قالمیردی.
توقات قالاسینین اوچ یانی قورولوق، بیر یانی سو ایدی، وحشی تونا( دانوب) چایی. حسن پاشا بو یولو آچیق قویموشدو، کوراوغلو یا سربازلارینین الی له اؤلدورولسون، یادا اؤزونو سویا ووروب، بوغولسون دئیه.
کوراوغلو گؤردو یوللارین هامیسی باغلی دیر، چوخ شمشیر ووروب سرباز اؤلدوردوکجه یوللاری داها چوخ باغلیا جاق. تونا چایینا ساری باخیب گؤردو یول آچیقدی. قیرآتی او طرفه سو٘روب دئدی: آتیمی اوینادیرام دوشمانین او٘ره‌یین او٘زه‌م. بوگون گرک پاشادان یئددی ایللیک تالان آلام، قیرآت بیر او٘زگونچو کیمی تونا دان کئچه‌جک. بونو دئییب اؤزونو سویا ووردو. سو آتین قولاقلارینا دک چیخدی. کوراوغلو سویون چوخ گوجلو اولدوغونو گؤردو. آت اومودسوز جاسینا ال آیاق چالیردی. اللرین قیرآتین بوینونا سالیب دئدی: آی منیم جئیران آتیم، آی منیم قارتال قانادلی آتیم، تئز اول، یئیین له. سحر آخشام تومارلایاجاغام سنی. قیزیلدان ناللایاجاغام سنی، نه جور اولورسا منی بوردان چیخاردیب، چنلی بئله یئتیر. قیرآت کوراوغلونون آوازین ائشیدیب سانکی قاناد چیخارتدی. او٘زه او٘زه اؤزونو چایین او تایینا یئتیردی. کوراوغلو چؤنوب باخیب گوردو حسن پاشا هله ده قالادان آشاغا ائنمه‌ییب. سسله دی: آهای پاشا، بو دفعه اورون باشیندا گیزلنیب، الیمدن قاچدین. گلن سفر گؤروم هاران وار گیزلنه سن. گئنه گؤروشه جه ییک!… بونو دئییب یولا دو٘شدو. گلیب گلیب چنلی بئله یئتیشدی. قیرآت چنلی بئلین اییین آلینجا ائله کیشنه دی کی، سسی داغا داشا دو٘شدو. یولداشلار هامیسی کوراوغلونو دؤوره له ییب، سوروشدولار: کوراوغلو، خوش گلمیسن! دئ گؤره‌ک نه لر گؤردون؟ آتی نئجه تاپیب گتیردین؟ کوراوغلو باشینا گلنلری دییرماندان تونا چایینا جان یولداشلارا دئدی. یولداشلار اونو اینجیتدیکلریندن پئشمان اولوب باشلارین آشاغا سالدیلار. کوراوغلو دئدی: او٘زولمه یین. سیز حاقلییدینیز. من هر گلنه اینانیب، آتین آچارینی کچله وئرمه مه لییدیم. ایندی اولان اولوب. آما بونو دا بیلین، منه ده کوراوغلو دئیرلر! نیگار خانیم گؤردو کوراوغلو گئنه داشماقدادی. یولداشلارا گؤز ووروب دئدی: کوراوغلو بیز سنین گئرچکدن کوراوغلو اولدوغونو بیلیریک.یوخسا سنین دؤوره وه ییغیشمازدیق! دو٘زدوکی ایگید سن، قورخمازسان، ایشلرین یول یؤنده مین بیلیرسن، آما اؤز آرامیزدا قالسین قاراشین سان، او٘ز گؤزون ائله بیر شئی دئییل! … یولداشلار گو٘لدولر، کوراوغلو اؤزو ده گو٘لدو. سونرا سازی باغرینا باسیب اوخودو: آی منه قاراشین دئیَن گوزل، سنین قاشلارین قارا دئییل می؟ بوینونا آخان ساچلارین قارا دئییل می؟ آی چنلی بئل گوزلی، او آیا گونشه بنزر او٘زونده کی خال قارا دئییل می؟ کوراوغلو او٘ره‌کدن سئور سنی، سازیما آوازیما قولاق وئر، او گؤزلرینه چکیلن سورمه قارا دئییل می؟
سون 🌼🌸
۱۳۴۷ یای
ادبیات سئونلر کانالی
