منیره فروغی بو ایل ۱۱-جی ساغلیق رزیدنتی اولاراق حیاتینی ایتیریب
تهران شهید بهشتی طب علملری بیلیم‌یوردو بو بیلیم‌یوردونون تهرانداکی طالقانی خسته‌خاناسی‌نین رزیدنتی اولان اؤیرنجیسی‌نین حیاتینی ایتیردیگینی آچیقلاییب.
بو بیلیم‌یوردو اینستاگرام صفحه‌‌‌سینده مهر آیینین باشیندان بری طالقانی خسته‌خاناسیندا چالیشان شهید بهشتی طب علملری بیلیم‌یوردونون مامایی و قادین دوغوم فاکولته‌سی‌نین ۲-جی دؤنم رزیدنتی دوکتور منیره فروغی‌نین کرونا خسته‌لیگیندن دونیاسینی دییشدینی یازیب.
لاکین بعضی سوسیال شبکه قوللانیجیلاری منیره فروغی‌نین کرونا خسته‌لیگیندن اؤلدویونو تکذیب ائده‌رک اینتیحار ائتدیگینی یازیبلار.
گنج رزیدنتین اؤلومو آرتیق بیر نئچه طب اؤیرنجیسی‌نین اینتیحاری ایله باشلایان ایران خسته‌خانالاریندا طب اؤیرنجی‌‌‌لری‌نین آغیر حیات شرایطی ایله باغلی موذاکیره‌لری یئنیدن جانلاندیریب و طب فاکولته‌سی اؤیرنجی‌لری اؤز تجروبه‌لرینی سوسیال شبکه‌لرده #رزیدنتلیکدن‌ـدانیش هشتگی ایله بؤلوشوبلر.
دوکتور منیره فروغی بو ایلین باشیندان بری دونیاسینی ديیشن ۱۱-جی طب اؤیرنجیسی‌دیر.
