ذکیه ذولفقاری ;1399 قاراباغین 44 گونلوک قورتولوش ساواشیندا، گنجه‌ده دوشمن بومباردمانیندا شهید اولانلارین روحونا اتحاف اولونور
آرزی -آنا هارا گئدیرسن؟ آرزی سوردو.
– آیاغ اوسته گئدیرم بیر آنام گیله جانیم، سیز معلیم دئدیگی درسلرینیزی، تکلیفلرینیزی یازینجا، من قایدارام.
– هله‌لیک آنا. آناسی‌گیلین قاپیلارینی دؤیه‌نده، ندنسه اورگی قاپیلا بیرگه دؤیونوردو.
-هجر قیزیم خوش گؤردوک، چوخداندی گلیب بیزه باش ورموسان ها، چوخ داریخمیشدیق سیزه.
-آنا‌جان حاقلیسان! آنجاق ایشیم ائله چوخدو بو گونلر کی، اؤزون بیلیرسن دا، گونوم چوخراق تیکیش ماشینی‌نین آرخاسیندا کئچیر. هله آنا قاقاشدان نه‌خبر؟
– قاقاش تئز- تئز زنگ آچیر شوکورآللاها سلامتدی. هه بیلیرم قیزیم ایشلریندن خبریم وار، سنه فخر ائدیرم. من قوجالمیشام، ألیمدن بیر ایش گلمیر. سن منیم‌ده وریمدن ایشلییرسن جانیم. آرزی جان!گؤرورم چوخ هووشنه‌ده‌سن، سؤزلویه اوخشاییرسان بوگون. بیر شئی می دئمک ایسترسن.
– هه! آنا أصلینده ائله سیزه بیر سؤز دئمگه گلمیشم. بیز، منله قهرمان، بؤلگه‌یه گئتمگه قرار وئرمیشیک. راضی اولسازسا آرازلا-آرزی بیز قایدانا جان گلیب سیزده قالسینلار.
-راضی اولساز ندی هجر جان. اونلار منیم جانیمدیلار. سیز آرخاینجا گئدین. اینشاللاه خوش خبرلرله قایدارسیز. -اینشاللاه آنا، اینشاللاه. من چاییمی ایچیم تئز گئدیم. بوگون بایراقلاری تحویل وئرجَیه‌م. ایشیم چوخدور. اوشاقلاری سیزه، سیزی ایسه آللاها تاپشیرام آنا. آناسی بیرآز گؤزله ایندی گلیرم دئییب، او بیری اوتاغا کئچدی. چوخ چکمه‌دی کیچیک بیر چانتانی هجرین ألینه وئریب دئدی:
– هجر جان بیر آز پول، بیر آز ایسه یئر یئمه‌لیدی قویدوم. همده قاقاشا بیر ایکی دست دئیشیک اوچون پالتاردی. قاقاشی گؤرسنیز وئررسیز. گؤرنمزسزسه، هامیسی سیزین اولسون. نجور صلاح بیلسنیز خرجلیرسینیز.
– آنا بونلارا أصلا گرک یوخودو. اوردا پول پارانی نئینیریک جانیم آنام!
-قبول ائتمزسن چوخ اینجییرم قوزوم، اینان.
– اولدو آنا اولدو. سنله من هئچ باشارا بیلمیرم. اؤزوزدن موغایات اولون. سنده دوعا ائت آنا! دوعا ائت. آنا- بالا ائله قوجاقلاشدیلار سانکی سون گؤروشلریدی. هجر آتاسیلا دا چوخ مئهربانلیقلا ویداعلاشیب آغلار گؤزله، قاپیدان چیخدی.
-سلام بالالاریم من گلدیم. دئیین گؤروم درسلرینیزی اوخودونوزمو؟ آرزی، آناسی‌نین قاباغینا قاچیب سئوینجک دئدی، آنا سن ننه گیله گئتدین، بیزده آتاملا آراز قیراغینا گئتدیک. بیلمیرسن آنا نه‌لر گؤردوک!!!. چوخلو کیشی، قادین، اوشاق اوتای دا، بیر چوخو ایسه بوتایدا دورموشدولار! یوموروقلارینی قالدیریب قیشقیریردیلار… نسه دئییردیلر، چوخو آغلاییردی، من قالمیشدیم آرادا، بو ایشلردن باش تاپانمیردیم. آنا سن بیلیرسنمی بونلار ندن گونده آراز قیراغینا یغیشیرلار؟
– نه گؤزل ایش گؤروبسوز جانیم. هله دئ گؤروم نه دئییب قیشقیریردیلار؟
– چوخونو یاخشی باشا دوشمدیم. فقط بیلدیم قیشقیریب دئییردیلر: قاراباغ بیزیمدی بیزیم اولاجاق!…
هجرین فیکری قارماقاریشغیدی. قراریندا شوبهه‌سی اولمادیغینا رغمن، اوشاقلاریندان نئچه گون آیری قالماق دوشونجه‌سی اورگینی سیخیردی. نه‌ایسه باشینی ایشه قاتیب بیر آز راحاتلادی. او گون آخشاما جان تیکیش ماشینین سسی ائودن کسیلمدی. آخشام اوستو یورغون آرغین بایراقلاری اوطولویوب سلقه‌یله باغلادی. سحر بیرینجی ایشیم بونلاری تحویل وئرمک اولار، اؤزونه دئدی. آخشام یئمگی حاضیرلاماغا مطبخه ساری گئدنده، آرازین سسینه دیسکیندی.
اونلا آرزی ألینده بیر مکتوبو هجره طرف اوزالدیب دئدی: آنا صاباح اورا چاتاندا بونو داییما وئر، دئنه بونو یاپیشدیرسین شوشانین دووارینا، همده اونو اؤپ بیزیم وریمیزدن. هجر حئیرتله دویغولانیب اونلارا باخدی. آغلار گؤزویله ایکیسین ده مؤحکم باغرینا باسیب اؤپدو. آنجاقندنسه بو گون هجر چوخ غریبه حیسلر یاشاییردی. اؤزوندن آسیلی اولمایاراق یاتاناجان بیر آن بئله، گؤزونو اوشاقلاردان چکه بیلمیردی. نه‌ایسه، عائله‌جه شاملارینی سوکوتدا یئدیلر. اوشاقلار یاتاق اوتاقلارینا کئچمدن، هجر بیر داها بو گون ایچینده نئچه کره دئدیکلری سؤزلری، توصیه لری تیکرار ائتدی.
عزیزلریم باخین: منله- آتانیزبیر نئچه گون کؤنوللولرله جیبهه‌یه گئتمگه قرار وئرمیشیک. بو یولچولوق چوخ سوره بیلرده، بیلیرسیز بو بیر وطن بورجودو بیز ایسه بورجوموزو اؤدمه‌لییک. اینشاللاه ساغ سالامات ظفرله قاییدیب گله‌جییک. امینم سیز چوخ یاخشی آنلایشلا ننه – بابا یلا داوراناجاقسینیز. سیز منیم جان جییرلریمسیزو… آردینی دئیه بیلمدی .
گئجه یاریدان کئچمیشدی، آرزیلا -آراز شیرین یوخونون ایچینده، آنجاق نه هجر یاتا بیلیردی نه قهرمان، یاتاقدا اویان بویانا فیرلانیب نه اولاجاغی دوشونوردولر، بیردن چوخ دهشتلی گورولتو بیر سس گلدی، آردینجا تاوان هجرله قهرمانین اوستونه یخیلدی.
هجر تکجه اورکدن آرازلا- آرزینی سسلیه بیلدی و تامام… ایلک آرزی، سوندا آراز یوخودان دیک آتیلدیلار، آنا سسلیه- سسلیه بیر باشا آتا- آنالاری‌نین یاتاق اوتاغینا قاچدیلار. چوخ سسلدیلر… بیر سس گلمدی کی گلمدی… قونشولارین بیری هجرین چانتاسیندا اولان اوشاقلارین مکتوبونو ائوین خارابلاری‌نین اوستونه یاپیشدیردی: بیز اوشاقلار ساواشدان بئزاریق.لوطفا یوردوموزدان چیخین.
“بیز اوشاقلار ساواشدان بئزاریق. لوطفن یوردوموزدان چیخین”.
