جوانروددا ۱۴ یاشلی ایکی قیز اینقیلاب کئشیکچیلری طرفیندن ۵ ساعت سورغویا چکیلیب
اینسان حاقلاری سایتلاری، جوانرودلو ۱۴ یاشلی سونیا کریمی و پریا فتحی‌نین اینقیلاب کئشیکچیلری اطلاعاتی طرفیندن چاغیریلدیغینی و ۵ ساعت دیندیریلدیگینی بیلدیریر.
ایکی یئنی‌یئتمه قیز اؤتن هفته “تارا احمدی” آدلی باشقا بیر ۱۶ یاشلی قیزلا بیرلیکده توتولدو و سونرا سربست بوراخیلدی.
سربست بوراخیلدیقدان سونرا اؤزونو آساراق اینتیحار ائدن تارا احمدی حاضردا جوانرودداکی حضرت رسول خسته‌خاناسی‌نین آی‌سی‌یو شؤبه‌سینده یاتیر.
بیلگیلی بیر منبع‌یه گؤره، سونیا کریمی و پریا فتحی، ۷ شهریور بازار گونو سحر ۸-دن ۱۳-دک اینقیلاب کئشیکچیلری اطلاعاتی طرفیندن دیندیریلیب و تهدید ائدیلیبلر کی تارا احمدی‌نین حبسی و اینتیحاری ایله باغلی مئدیایا دانیشسالار، اونلارا قارشیلیق وئریله‌جک.
هنگاو اینقیلاب کئشیکچیلری‌نین تارا احمدی‌نین عائله‌‌‌سینه تضییق گؤستردیگینی، اینقیلاب کئشیکچیلری‌نین اونو و باشقا ایکی یئنی‌یئتمه‌نی توتماقدا هئچ بیر رولو اولمادیغینی و عائله ایتکین دوشدوکدن سونرا جوانرود پولیسینه بیلدیردیگینی و پولیس طرفیندن تاپیلدیغینی سؤیله‌مه‌لرینی ایسته‌دیکلرینی یازدی.
ایسلام جمهورییتی گوونلیک گوجلری طرفیندن ایرانین باتی ایالتلرینده اوشاق و یئنی‌یئتمه‌لرین ساخلانیلماسی، گؤرونمه‌میش بیر حادثه دئییل. بو ایلین خرداد آییندا اطلاعات مامورلاری سقزین سعدی کوچه‌سینده‌کی بیر وطنداشین ائوینه باسقین ائده‌رک ژینا حسنی مقدم آدلی ۱۶ یاشلی قیزی حبس ائتدیلر.
۱۳۹۹–جو ایلین تیر آییندا مریوانین اینقیلاب کئشیکچیلری اطلاعاتی هورامان بؤلگه‌سینده‌کی سلین کندیندن “هیمن” و “کیومرث ادوایی” آدلی ایکی اوشاغی توتاراق سنندجده‌کی “شهرامفر” تجرید‌خاناسینا کؤچوردولر.
iranwire
