اتوبوس قضاسیندا مهشاد کریمی و ریحانه یاسینی آدلی ایکی ژورنالیست حیاتینی ایتیردی
کانی سیب تونلینی زیارت ائتمک اوچون باتی آذربایجان ایالتینه گئدن بیر سیرا چئوره ژورنالیستلرینی داشییان بیر اتوبوس نقده شهری یاخینلیغیندا آشدی و ایسنا ژورنالیستی مهشاد کریمی و ایرنا ژورنالیستی ریحانه یاسینی بو حادثه‌‌‌ده حیاتینی ایتیردی.
ایران قیزیل‌آی جمعيتی‌نین مودیری‌نین ایسنایا وئردیگی بیلگیلره گؤره، اتوبوسداکی یارالانان ۳۱ نفرین چوخو ژورنالیستلردیر. یارالیلاردان بعضیلری‌نین دورومو آغیر اعلان ائدیلدی. “امیر جعفرزاده” آرتیردی: “حادثه پیرانشهر-نقده یولوندا مئیدانا گلدی و قیزیل‌آی و تعجیلی یاردیم قروپلاری و باشقا ایلگیلی تشکیلاتلارین ایشتیراکی ایله حیاتا کئچیریلیر.”
او آرتیردی: “بو ۳۱ نفردن ۲۹ نفر یارالاندی، ایکی نفر ده حیاتینی ایتیردی. یارالانانلاری طب مرکزلرینه چاتدیرماق اوچون قیزیل‌آی قورتارما هلی‌کوپتری حادثه یئرینه گؤندریلدی.”
ایران قورتارما تشکیلاتی‌نین رئیسی گنج ژورنالیستلر کلوبونا دئدی: “اورژانس، دؤرد-آلتی نفرین آغیر یارالاندیغی بیلدیریلدی و هلی‌کوپترین یارالیلاری اورمیه خسته‌خاناسینا آپاردیغینی بیلدیردی.”
توییترده بیر چئوره ژورنالیستی اولان جواد حیدریان حادثه‌‌‌نی بئله ایضاح ائتدی: “قضادا یارالانان چئوره ژورنالیستلرینه گؤره، بو اتوبوس ۲۱ نفرلیک بو اکیبه وئره بیله‌جکلری ان پیس اتوبوس ایدی. اتوبوس او قدر کیفیت‌سیز ایدی کی، اوشاقلار شوخلوقلا دئییرمیشلر بیزی اؤلدورمک اوچون گتیردیلر. گؤروندویو کیمی، ژورنالیستلر کانی سیب بندی‌نین تونلیندن چیخدیقدان سونرا اتوبوسا میندیلر و اونلاری گؤزله‌ین مودیرلرین زورلاماسی ایله سوروجو کوبود و بوروق یولدا یوکسک سرعتله حرکت ائتمک زوروندا قالیب. بیر نئچه دقیقه‌دن سونرا سوروجو اوشاقلارین گوونلیک کمرلرینی باغلامالارینی طلب ائدیب، آما چوخ گئج ایدی.”
حیدریان آرتیردی: “اتوبوس بیر نئچه گوجلو ضربه‌‌‌دن سونرا چوخ یوکسک سرعتله یولون ساغ سولونا گئتدیکدن سونرا سول طرفینه دوشدو و اوشاقلارین چوخو یارالاندی. ایکی همکاریم منه دئدیلر کی، قازاندیقلاری تک شانس اتوبوسون دره‌نین دیبینه دوشمه‌مه‌سی ایدی، یوخسا هاممی اؤله بیلردی.”
“ایران ژورنالیستلر کلوبو”نون تلگرام کانالی یارالانان بعضی ژورنالیستلرین آدلارینی بئله آچیقلادی: «کیمیا عبدالله‌پور»، «هادی زند»، «فروغ فکری»، «آیسان زرقام»، «سمیرا عبدالله‌پور»، «نگار اکبری»، «ریحانه یاسینی»، «زهرا رفیعی»، «آسیه اسحاقی»، «علی شریف‌زاده»، «حسن ظهوری»، «محمدرضا کیاشمشکی»، «صدرا محقق»، «یاسمین بخشی»، «ربابه باباخانی»، «معروف ماهر» و «مهدی گوهری».
بو تلگرام کانالی آیریجا یازیب: “مهشاد کریمی بیر دونیا اومید ایله آرامیزدان آیریلدی.
iranwire
