مرضیه احمدی اسکویی
مرضيه احمدی اسکويی 1324- جی ايلده اسکو شهرينده اکينچي عايله سينده دوغولموشدور. او، تبريز تربیت معلّم مکتبينی بيتيرندن سونرا معلم اولدو. م.ا.اسکويی نين ادبی ياراديجيليغی حکايه و شعر مجموعه سيندن عبارتديرکی، دفعه لرله نشر اولونوب. يازيچي جمعيتين ان ايچري قاتلاريندان حکايه يازماغا امکان تاپا بيليبدير. او کتابينين مقدمه سينده يازير:
“بو يازيلار منیم يالنيز بير قيسم خالقيمين بلالي ياشاييشينين شرحيدير کي، من گؤزومله گؤرموشم. بونلارين هئچ ده تازاليغي يوخدور، چونکي هر آدديمدا بو وارليغي تالانميش اؤلکه ده آيري- آيري محنتلرله راستلاشارسان. بو يادداشلاري يازماقلا ايسته ييرم خالقيم بيلسين کي، بيز هانسي سببلره گؤره ديشينين ديبينه جن سیلاحلانميش دوشمنه قارشي دؤيوش ميدانينا گيرميشيک.(38- احمدی اسکویی مرضیه، خاطراتی از یک رفیق، ص 145)
بو کتابدا سککيز حکايه، چوخلو خاطره و شعر درج اولونوبدور. حکايه لرين چوخو خاطره ساياغي يازيليب. نمونه اولاراق بو مجموعه دن ان دَيَرليسينه کی “ايلک اؤلومون تجربه سي “ آدي ايله يازيليب، نظر ساليريق:
حکايه بير يتيم، يوخسول قيز اوشاغينين ماجراسيدير. او بالاجا قارداشيلا بير خارابادا ياشاييرلار. يازيچي اؤزو ده بير اوشاق باخيشيلا اونونلا دوستلوق ائدير و اونون بدبختليکلريندن اوخوجولار اوچون خبر وئرير:
” نوبار، طاهره – عيبه جر طاهره- و بير ياشلي جلالين مرضيه سي منيم دوستلاريم ايديلار کي، ائولري بابامين ائوينين يانيندايدي. قونشولوغوموزدا اولان يولداشلاريملا کوسولوشنده، ائودن اکيليب اونلارين يانينا گئدرديم. اوينايان يئريميز ملا گنجي ميدانچاسيدي. نوبارين دا ائوي همين ميدانچادا ايدي. بيلميرم، اورانين آدي نيیه ملا گنجي ايدي، لاکين اوشاقلار اوچون اورانين اوچ حقيقي بوجاغي وار ايدي. بيرينجي ميدانچانين او گوشه سيدي کي، خالق، زيبيللريني اورا تؤکردي و بيز او زيبيللرين ايچيندن ميخ، شيش، چرخ و س. چوخلو درده دين شئيلر تاپارديق. ايکينجيسي بؤيوک توت آغاجي ايدي کي، کئچميش واختلاردان ارث قاليردي و ايندي ده قالير. اوچونجوسو نار آغاجي ايدي کي، باهاردا گوللريني دررديک.
نوبارين اللري منيم اللريمدن ده پارتلاغ ايدي. ساچلاري داراق اوزو گؤرمه ميشدي. کؤينگي و شالواري بير اندازه جيريق و ييرتيق ايدي. ساچلاري بيت و سيرکه ايله دولو ايدي. من آرزو ائدرديم کي، نوبارين ائويني ياخيندان گؤرم. بير گون بو خوشبختليک منه اوز وئردي. قاپيدان بؤيوک بير مطبخه کئچديک کي، ديوارلاري و ديرکلريني هيس باسميشدي. مطبخين ييخيلميش ديوارلاريندان دا اوتاقا يول وار ايدي. اوتاقين دؤشه مه سينده هئچ نه يوخ ايدي و گوشه سينده کورسو قويولموشدو. لاکين نه موتکّه دن خبر وار ايدي، نه دؤشکدن. کورسونو بير جيندير يورقان اؤرتموشدو کي، او يان- بو يانيندان قارين- باغيرساغي ائشييه تؤکولموشدو. يورغانين آلتيندا جيندا پارچاسي کيمي ياماقلي بير چارشاب دا سالينميشدي. اوتاغين بير گوشه سينده زيبيل قابيندان تاپديغيميز شئيلر گؤرونوردو کي، اوست- اوسته قالانميشدي. اونلارين ايچينده من بير چرخ بَيَنديم و گيزلتمه دن نوبارا دئديم. او دوروخمادان دئدي:
– سنين اولسون.
من چوخ تعجب ائله ديم، چونکي من اؤزوم اولسايديم وئرمزديم. او گون اؤزومو، پاخيل و آجگؤز حسّ ائله ديم.
نوبارين قيوير- زيويرينی اللشديرديگيميز حالدا بيردن او آغزيني برک باغلاييب بير اليني ده دوداقلارينا قوياراق او بيري اليله باغلي آغزيندان بوغونوق سسله منه آنلاتدي کي آغزيمي باغليام. سونرا نوبار الي ایله ديوارين کنارينه اشاره ائتدي. اورادا اوزون بير قيرخ اياق يئرييردي. من اييرنديم، حتّی قورخديم و ديواردان اوزاقلاشديم. قيرخ اياق گئتدي بير آيري دئشيکده گؤزدن ايتدي. نوبار دوداقلاريني آچيب دئدي:
– بَیَم سن بيلميرسن کي، قيرخ اياق آدامين ديشلريني سايسا آدام اؤلر؟
– يوخ.
– !!!
– هه، بيم گؤرمه دين من آغزيمي تئز باغلاديم؟ مني قورخو گؤتوردو، اختيارسيز دئديم:
– من داها گئديرم.
– هارا گئديرسن؟ گل اوتوراق کورسونون آلتيندا. سونرا او منيم اليمي توتوب کورسويه طرف چکدي.
– کورسو چوخ سويوقدو.
– يوخ او قدر ده سويوق دَييل، ائشيکدن ياخشيدير. دونن قونشوموزدا چؤرک ياييرديلار، تنديرلريندن اود گتيريب کورسوموزه تؤکدوم. داها بير آدام اود گتيرمه ميشدير.
من ائويميزه قاييتديم. قيرخ اياقين فيکري مني بوراخميردي.
گئجه برک قار ياغدي. داملاردان کوچه يه تؤکولن قار او قدر چوخ ايدي کي، من ايکي گون “ملا گنجييه” گئده بيلمه ديم. اوچونجو گون اورا گئدنده خالام قونشوسونا سويوق قانليليقلا دئييردي:
– باجي، ائوده تک قالماقدان جاني قورتاردي، اؤزو ده کي، قيز اوشاغي، صاباح بؤيوسيدي باشينا مين بلا گلردي. خالامين دئديگينه گؤره نوبار سويوقدان قوروموشدور. آنجاق بونلار بوش سؤزدور، اونون اؤلوم سيرريني من بيليرم
