سردشت و دهلران‌دا ایکی قادین جینایتی باش وئردی
بیری باتی آذربایجان ایالتینده اولن سردشت‌ده، باشقاسی ایلام ایالتینده دهلران ساکینی اولان ایکی قادین یاخین عائله عضولری طرفیندن اؤلدورولوب.
اینسان حوقوقلاری سایتی هنگاوین یازدیغینا گؤره وفا عبدالله‌زاده آدلی سردشتلی ۴۳ یاشلی بیر قادین، ۱۷ آذر ۱۳۹۹-جو ایل، بازار ائرته‌سی گونو ساعت ۲۳-ده ائوینین قارشیسیندا باشیندان وورولاراق اؤلدورولدو.
بیلگیلی بیر منبع بو اینسان حوقوقلاری مئدیاسینا بیلدیردی کی، خانیم عبدالله‌زاده بو یاخینلاردا حیات یولداشیندان آیریلمیشدی، عائله‌‌‌سی ایله علاقه‌‌‌سی یوخ ایدی و تک یاشاییردی.
هنگاو بو بیلگیلی منبع‌یه ایستناداً، خانیم عبدالله‌زاده‌نین “عائله موباحیثه‌لری” سببیندن قارداشی طرفیندن اؤلدورولدویونو سؤیله‌دی.
اینسان حوقوقلاری وئب سایتی هنگاو ۱۷ آذر ۱۳۹۹ بازار ائرته‌سی گونو دهلرانین دشت‌عباس بؤلگه‌سینده‌کی ذوالفقار کندینده باشقا بیر قادینین قارداشی طرفیندن بوغولدوغونو بیلدیردی.
گنج قادینین ۲۲ یاشی وار ایدی و یئرلی مئدیا اونون قتلینی “عائله موباحیثه‌سی” اولاراق بیلدیردی.
موسیان عومومی محکمه‌‌سی‌نین باشقانی گنج قادینین قارداشی‌نین قتل ایله باغلی اولاراق حبس اولوندوغونو سؤیله‌دی.
“عائله موباحیثه‌لری” مئدیانین و ایسلام جمهوریییتی‌نین مقاملاری‌نین قادین جینایتلرینی نورمال گؤسترمک و یاپیسال اولماماسینا ایستیناد ائتدیگی بیر قاورامدیر.
سون بیر نئچه آیدا قادین جینایتی خبرلری‌نین مئدیادا یاییلماسی ایله ایراندا توپلومسال دوشونجه بو قونویا داها حساس اولدو. آنجاق قانون‌وئریجیلر و محکمه حاکیميتی، قادینلارین زوراکیلیغا قارشی قانونی قورونماسی طلبینی گؤرمه‌مزلیکدن گلمکده داوام ائدیر.
بیر نومونه‌ده، آتاسی طرفیندن ۱۴ یاشلی تالشلی قیز رومینا اشرفی‌نین اؤلدورولمه‌سی و مئدیادا گئنیش یاییملاندیقدان سونرا محکمه اونو ۹ ایللیک حبس جزاسینا محکوم ائتدی، یعنی ان یوکسک ۱۰ ایللیک جزادان دا آز بیر جزایا محکوم ائدیلدی.
