ناموس آدینا؛ سنندجده بیر قادین قارداشلاری طرفیندن وحشیجه‌سینه اؤلدورولدو
سنندجلی و ایکی آزیاشلی اوشاق آناسی اولان ۳۱ یاشلی سرگل حبیبی ناموس آدینا ایکی قارداشی طرفیندن باشی کسیلدی.
اینسان حوقوقلاری تشکیلاتی هنگاو جینایتین ۹ آذر ۱۳۹۹-جو ایل، بازار گونو باش وئردیگینی بیلدیردی.
بو خبره گؤره، سرگل حبیبی ۸ آذر شنبه گونو آخشام ساعتلاریندا بیر گنجله ایلیشگی قوردوغو اوچون سنندجین ۱۵-جی پولیس مرکزی طرفیندن توتولدو و بو پولیس مرکزینه کؤچورولدو. ائله همین گئجه سرگل حبیبی‌نین حیات یولداشی اونون عائله‌‌‌سینه زنگ ائده‌رک قیزلارینی تحویل آلماق اوچون پولیس مرکزینه گئتمه‌لرینی ایسته‌دی.
گنج قادینین گوونلیگی‌نی نظره آلمادان و اونا قارشی زوراکیلیق ثبوتلارینا باخمایاراق گئجه ساعت اوچده نؤوبتچی حاکم طرفیندن ایکی قارداشینا تحویل وئریلدی. ایکی قارداش سرگل حبیبی‌نی سنندج‌دن بیر نئچه کیلومِتر اوزاقداکی بیر کنده آپاریر و اورادا باشینی کسیرلر.
حادثه ایله تانیش اولان بیر منبع، همین گئجه سرگل حبیبی‌نین ایکی قارداشی حسن و اسماعیلین اؤزلرینی پولیسه تسلیم ائتدیکلرینی و مووقتی نظارته آلیندیقلارینی سؤیله‌دی. سرگل حبیبی‌نین حیات یولداشی و اونونلا بیرلیکده حبس اولونان باشقا بیر شخص ده نظارتده‌دیر.
سرگل حبیبی، ۹ آذر بازار ائرته‌سی گونو سنندجدکی “محمدی” قبیریستانلیغی‌نین ۱۱-جی حیصه‌‌‌سینده، مراسیم کئچیریلمه‌دن تام بیر سس‌سیزلیک ایچینده دفن ائدیلدی.
