مهناز افشارین شکیلی گیلدا فیلمی‌نین آفیشلریندن سیلیندی
«مهناز افشار»، «گیلدا» فیلمی‌نین رئکلام آفیشلریندن شکیللری‌نین سانسورونا اعتراض ائتدی.
بیر مدتدیر خاریجده یاشایان ایرانلی آکتور، ۲۶ شهریور ۱۳۹۹-جی ایل چارشنبه گونو یئنی چکیلن کیوان علی‌محمدی و امید نکدارین فیلمی‌نین آفیشلرینده شکلی‌نین سیلینمه‌سی ایله باغلی توییتر صفحه‌‌‌سینده فیلمین رئکلام شکیللرینی یئر‌لشدیره‌رک یازدی: «بوش وعدلر و اینسانلاری یاندیرماق. بیر قادینا خالقین جمهورباشقانلیغی گؤروینی وعد ائدیرسیز، آما فیکیر آیریلیقلارینا گؤره یئنه ده بیر آکتورون شکلینی آفیشدن و رئکلاملاردان چیخاریرسیز!»
او، آنایاسا قورویوجولاری شوراسی‌نین سؤزچوسو عباس‌علی کدخدایی‌نین ایراندا بیر قادینین نؤوبتی جمهورباشقانی اولا بیله‌جیی احتیمالی ایله باغلی سون مؤوقئیینه توخوندو.
بیر چوخ اثری‌نین سون ایللر اکران اولماسینا ایجازه وئریلمه‌ین گؤرکملی ایرانلی یؤنتمن «عبدالرضا کاهانی»، و قاداغان اولونموش «ارادتمند؛ نازنین بهاره تینا» فیلمینده افشارلا ایشبیریگی ائتمیشدی بو مسئله‌‌یه اؤز تبکیسینی گؤستردی.
کاهانی توییتر صفحه‌‌‌سینده: «مهناز افشارین اوزونون فیلم رئکلاملاریندان چیخاریلماسی، اینسانین اساس حیات حوقوقلاریندان اوزاقلاشدیریلماسیدیر. سینما ائوی و اهالیسی همکارلاری‌نین سیلینمه‌سینه اعتراض ائتمیرلر؟! تام اولاراق نه‌لره اعتراض ائده‌جکلر ؟»
کاهانی ان چوخ قاداغان اولونموش فیلملرین رکوردونو الینده ساخلاییر و بو باخیمدان «آن‌جا»، «وقت داریم حالا» و ارادتمند؛ نازنین، بهاره، تینا فیلملرینه توخونا بیلریک.
مهناز افشارین سانسورا معروض قالماسی ایلک دفعه دئییل، اونون شکلی فریدون جیرانی‌نین یؤنتمه‌نی اولدوغو «آشفتگی» فیلمیندن ده چیخاریلدی.
بو گونلرده یؤنتمه‌نی کیوان علی‌محمدی و امید نکدار اولان گیلدا فیلمی آنلاین اولاراق یاییملانماقدادی. مهناز افشار بو فیلمده یئددی فرقلی قادین رولونو اویناییر.
