رقیه کبیری ; آجلیق باراتاسی رمانیندان کیچیک بؤلوم
عنبرین گؤزوندن گیزلین یئنه ده زئرزمییه دورتولورم. تعجّوبدن یئریمده قورویوب قالیرام. قاضی بیر اسکلئتی پینگ‌پونگ میزینین اؤنونده قویوب، قیراقدان دوروب اونا تاماشا ائدیر. ائله اسکلئته محو اولوب کی منیم قاپی چرچیوه‌سینده دایانماغیما برخود اولمور. من ده اسکلئته باخیرام. هئچ آزمایشگاهداکی اسکلئته بنزه‌میر. بو اسکلئت منیم برژیتیم دئییل. آیاق سوموکلری هئچ ده برژیتین آیاق سوموکلری تک اینجه دئییل. اوسته‌لیک، اومباسی دا برژیتین اومباسیندان یئکه‌دیر. خوشوم گلمیر بو اومبانی مقدس بیر جام کیمی تصوّور ائله‌ییم. بو کوْبوت اسکلئت آنجاق آجلیق دؤنمیندن قالمیش باراتادان باشقا آرتیق بیر شئی اوْلا بیلمز. نئجه اوْلا بیلر گلیب منیم خیالیمداکی جیلده گیره بیلسین؟…
قاضی، دایاندیغی یئردن اسکلئته ساری گئدیب، اونون آیاغیندا دیزه چؤکور. بیر آن منه ائله گلیر کی، مدرسه‌نین زئرزمیسینده دئییل، أسکی زامانلاردا قورولان بیر عنعنه‌نین، بیر آئینین تاماشاسینا دورموشام. قاضی دؤنوب منه باخیر. دئمک قاپی آغزیندا دورماغیما برخود اولوب. باشینین ایشاره‌سیله منی چاغیریر. قریبه بیر حالیم وار. بیلمیرم هؤوشنه‌لی‌یم یوخسا قورخورام. نهایت، ایچری گیریب اسکلئتین اؤنونده دایانیرام. بیر آن نظریمه گلیر پهلوان ناییب‌قاضی اسکلئتین گؤزلرینین کاساسینداکی بوشلوقدان منه باخیر. جانیم گیزیلده‌دییر.
قاضی اسکلئتی یئریندن قالدیریب، بود سوموکلرینی قوْلومون اوستونه سالیر. او بیری ألیم غیرارادی حالدا اسکلئتین اوْنورغاسیندان یاپیشیر. قاضینین آرخاسیجا زئرزمینین پیلله‌لریندن یوخاری قالخیرام. سئچه بیلمیرم اوْیاغام یوخسا یوخودا اسکلئتلرین آیینلارینا قاتیلمیشام. عنبرله زیست‌شوناسی معلیمی حئیرتله بیزه باخیرلار. قاضی آزمایشگاهین پیلله‌لریندن یوخاری قالخیر. من ایسه قوجاغیمدا اسکلئت، روْبوت کیمی اونون آرخاسیجا گئدیرم. بولمورم کیلاسا ساری گئدیرم یوخسا آش تؤکن قبریستانینی فیرلانیرام.
