یئر اوزونون اولدوزلاری 🖋 مهدیه آهنی
✅ بوگون ایلک اولاراق استادیوما گئدجه‌یم. بو یازینی سحر سکگیز یاریم‌دا یازماغا باشلاییب قالانینی دا یاریشدان قاییداندان سونرا بیتیره‌جم.
📌 ایندی صوپانه‌چی‌ده املت یئیه‌رک یازیرام. هیجانلیام هم ده ایکی جور بیر جورَم. ایللر جان آتان چابالایان قیزلارین ایشی سایه‌سینده بوگون رسمی اولاراق بلیت آلمیش او میدانا آیاق باساجاغام. آنجاق بو قدر امنیتی شکیلده ثبت‌نام ائله‌مک، سونرا تک‌جنسیتی صندللرده اوتورماق چوخ دا عزت‌لی بیر گیریش دئییل. هرحالدا ملی دییشمه‌لر ائله بوجور یاریم یاپالاق اولوبدور. قیرمیزی ماتیگیم بیر یوموشاق سیلاح کیمی یانیمدادی. قیرمیزی شالیم دا بوینومدا. آنجاق بیرزادلارین یئری بوشدور.
📌 بیلیرسن ناوار؟ دوشونورم اله کئچیرتدیییمیز حاقلار بیزی تکجه سئویندیریجی حالا گتیرمیر. چییینیمیزده بیر یوک ده داشیییریق. بوتون فرصتلری قاچیرماماق کیمی بیر حیس وار ایچیمیزده. نه باغیراجم؟ حاضیرلادیغیم شعارلار ندیر؟ یانیمدا پوستر گیزلدیممی؛ بئله‌نچی سواللارینان ال خیتده‌یم بئینیمده. دیک دورا بیلمز بیر شکیلده، جانیم قاشینیر. بیر ایش گورمک یوخسا تکجه اورانین هیجانیندان لذت آلیب جمعیته قوووشماق دوشونجه‌لری ایچیمده دالغالانیر.
.
📌 ایش یئریمده‌یم و ۸،۹ شعار حاضیرلاییب پرینت آلیب باشماغیمدا یئرلشدیرمیشم. هیجانیم گئتدیکجه آرتیر. تیراختور بیزه تکجه توپ اویونو دئییل ده، البته ملی هویتلره آگورادیر، منه قادینلاردان باغیرماق ساحه‌سیدیر ده. یوبانمیشام. چیخمالیام.
📌 استادیوم گیریشینه یاخینلاشماقداییق. گاردلار نم نئچه کیلومترلییینده دایاندیریب پیادا گئتمه‌ییمیزی ایسته‌دیلر. چوخ اصراردان سونرا دا یوخ ائشیدیب ماشینیمیزدان دوشدوک. بو ایش چوخلو قادینلاری قایتارا بیلر. لیلا ایله بیرلیکده یولا دوشوروک.
پیادا قیزلار بیر اتوبوسو ساخلاتدیریرلار. هر نفردن ۲۰مین ایسته‌دی. یامان تسهیلات قوشوبلار. بیراز سونرا بیر موتورون دالینا آتیلیب استادیومون دیککینه چیخیریق. مامورلار هی قایتارماق ایسته‌ییرلر. اصرارلا شوخلوقلا موتورچونون ساخلاماماغینی ایسته‌ییریک.
.
📌 گوءردویوم ان گوءزل صحنه‌لردن بیری ایله اوز اوزه اولموشام. گوزل یاشیل و قیرمیز جمعیتدن آدرنالین فیشقیریر. لاب یوخاری سککی‌لرده دایانیب نئچه دقیقه بو منظره‌دن گوءز گوءتورنمیرم.
📌 طبیعتا ژست توتوب عکس سالماغا باشلاییریق. تار تانیش قیزلاری گوءروروک. هامیمیز هیجانلیییق. مامورلارین دقتینی چکمه‌یه‌رک شعارلاردان عکس سالماغی اویونون ایکینجی یاریسینا ساخلاماق قرارینا گلیریک. جمعیته قووشوروق. 《تورک دیلینده مدرسه، اولمالیدیر هرکسه》 ان اوجا شعاریمیز اولور استادیومدا. طبیعتا گوءی اولدوزو اولمادیغیمیزا گوءره بوبیری شعارا قاتیلمیریق:)
📌 اویونون ایکینجی یاریسیندا خیمیر خیمیر، قورخاراق کاغاذلاریمی چیخاریرام. عکس سالدیقجا اوره‌ییمیز یئرینه گلیر. گئت گئده ایشیمیزه حاقلی اولدوغوموزا آرتیق اینانیب آچیلیشیریق. داها جسارتله ژست توتوب شکیل چکیریک. بیر زمان اوءزومه قرار وئرمیشدیم ایلک دفعه استادیوما گئتدیییمده زهرا نویدپورو یاددان چیخاتمایام. بوتون شعارلاریمیزی خرجله‌ییریک. دینجلیب سئوینیریک. یانیمیزدا بیر قادین منله اورتاق بیر عکس سالماغیمی ایسته‌ییر. شوبهه‌له‌نیریک. لیلا شکیللری امین بیر دوستا گوءندریب اوءز تلفونوندان سیلیر. اوءزوموزو قورومالیییق.
📌 سون دقیقه‌لرده کاغاذلاری ایت باسدیر ائتمه‌لیییک. سونونجو کاغاذیمی دا موشک ائدیب جمعیتین باشینا آتیرام. یونگول و اوءزوموزدن راضی چیخیشا ساری گئدیریک. چوخلو دوربین، مامورلار، پلیس، گارد و شخصی پالتارلی راپورچی‌لار اولا-اولا گوزل آخشام یاراتمیشیق. هم جمعیته قوووشوب آدرنالین لذتینی یاشاییب هم چیینیمده‌کی یوکومو بیراز یونگوللشدیرمیشم.
🆔@AzimHassanzadeh
