«ایشیق» تخلصلی آذربایجان شاعری «مخمر خانیم نجفی» بهمن آیی‌نین ۱۷نجی گونو یاشادیغی کرج شهرینده حیاتلا وداعلاشدی
چوخ تاسفله «ایشیق» تخلصلی آذربایجان شاعری «مخمر خانیم نجفی» بهمن آیی‌نین ۱۷نجی گونو یاشادیغی کرج شهرینده حیاتلا وداعلاشدی. مخمر خانیم نجفی اوزون ایللر اؤز حیات یولداشی آذربایجانین تانینمیش عالیم شاعری و تدقیقاتچیسی اوستاد «احمد شایا(آلاو)» ایله برابر ادبیاتیمیزین انکشافیندا چالیشمیش و زحمتلره قاتلاشمیش قادین شاعرلریمیزدن ایدی.
مخمر خانیم نجفی ۱۳۱۱-جی ایل خوی شهرینده دونیایا گلمیش، تحصیلاتینی همن شهرده بیتیرمیش و ۱۳۳۰-جی ایل ۲۱ آذر نهضتی‌نین اشتراکچیلاریندان اولان هم‌یئرلیسی «احمد علی‌اصغر اوغلو اوردوخانی(سونرالار: اورتانی- شایا) ایله عائله قورور. آذربایجان ادبیاتینا خصوصیله ده شعرینه اؤز حیات یولداشینین تاثیری آلتیندا اوز گتیریر و و «ایشیق» تخلصینی سئچه‌رک، شعر یازماغا باشلاییر.
مخمر خانیم نجفی‌نین ۱۳۸۱-جی ایل «منیم اینجه دویغولاریم» آدیندا ۱۰۲ صحیفه‌لیک بیر شعر مجموعه‌سی یاییلیبدیر.
«ایشیق» – آذربایجان ادبیات و اینجه صنعت سایتی- امکداشلاری آدیندان ادبیاتیمیزین قایغی‌کئشی شاعر «مخمر خانیم نجفی – ایشیق»ین ایتگیسینی حؤرمتلی شایا و نجفی عائله‌لرینه باش ساغلیغی وئریر، خاطیره‌سینی عزیزله‌ییریک.
«ایشیق» – آذربایجان ادبیات و اینجه صنعت سایتی
۱۹ بهمن ۱۴۰۳
قایناق:ایشیق سایتی
