صفا مصطفى زاده و اوغلو ماكودا قادين جنایتی‌نین یئنی قوربانلاریدیر
ایران‌وایرن الده ائتدیگی بیلگیلره گؤره، ماکو (بازرگان) شهرینده ۳۱ یاشلی صفا مصطفی‌زاده آدلی قادین حیات یولداشی طرفیندن اوشاغی ایله بیرلیکده چوخ‌سایلی بیچاق ضربه‌سی ایله قتله یئتیریلیب.
بیلگیلی قایناقلار قادینین حیات یولداشی‌نین دانیال آدلی ۱۱ یاشلی اوشاقلارینی دا اؤلدوردویونو، داها سونرا ایسه اؤزونو اؤلدوردویونو تصدیقله‌ییب.
بیلگیلی قایناغین ایران‌وایره وئرذیگی بیلگیلره گؤره، گنج قادین حیات یولداشیندان آیریلماق نيتینده اولوب، آنجاق چوخلو جهدلرینه باخمایاراق، بوشانماق اوچون اطرافینداکیلاردان دستک آلماییب. او، هر دفعه باشقا عائله عضولری‌نین و حیات یولداشی‌نین واسطه‌‌‌چیلیگی ایله اؤز ائوینه قایتاریلیب.
بو فاجعه‌‌‌دن بیر نئچه گون اؤنجه صفا یاخین دوستلاریندان بیری ایله دانیشدیغی زامان یاشاماغا داوام ائتمک گوجونو ایتیردیگینی، آیریلماق نيتی‌نین قطعی اولدوغونو بیلدیریب.
یئرلی مئدیا جینایتی “عائله موناقیشه‌سی” ایله باغلانتیلی آدلاندیرسا دا، بعضی قایناقلار داها اؤنجه ده اونو اؤلدورمکله هده‌له‌دیگینی و سوندا بو عملی حیاتا کئچیردیگینی بیلدیریر.
بیر سیرا قونشولار دا اونایلاییبلار کی، حادثه‌‌‌نین ایلک ساعتلاریندا جوتلویون آزیاشلی اوشاغی‌نین آتاسینا “ساچینی بوراخ، اونو اؤلدورمه” دئیه یالواردیغینی ائشیتسه‌لر ده، “عائله موناقیشه‌سی اولدوغونا ایناناراق و شخصی مسئله‌‌دیر” دئیه‌رک موداخیله ائتمه‌ییبلر و اشواغین دا جانسیز بدنی حامامدا اؤلو تاپیلیب.
#آذربایجان_خبرلری #قادین_جینایتی #قتل
