آزربایجانلی اوشاق “تورهان” آدی تورک اولدوغو اوچون ۵ آیدیر کیملیک آلا بیلمیر
ایران‌وایره چاتان خبره گؤره، وطنداشلیق قئیدیاتی تشکیلاتی ۵ آیدیر اهر شهریندن اولان تورهان آدلی تورک اوشاغا کیملیک وئرمکدن ایمتینا ائده‌رک اونون عائله‌‌‌سینی بیر چوخ پروبلئملرله اوز‌لشدیریب.
تورهانین عمیسی هادی رحمتی دئییب: “بو اوشاق ۵ خرداد ۱۴۰۳-ده دونیایا گلیب و والیدئینلری اونون اوچون تورهان آدینی سئچیبلر. آنجاق اهرین وطنداشلیق قئیدیاتی چالیشانلاری اونا کیملیک وئره بیلمه‌یه‌جکلرینی آچیقلادیلار، چونکی “آد تورک آددیر و تورهان آدی اونلارین آد سیستمینده یوخدور”.
تورهانین والیدئینلری ده وطنداشلیق قئیدیاتی شؤبه‌سینه شیکایت ائدیب. محکمه ایکی دفعه ایجلاس کئچیره‌رک بو عائله‌‌‌یه قارشی قرار چیخاریب. یئتکیلیلر دئییرلر کی، ایالت مرکزیندن اونلارا دئییبلر کی، بو آد مقبول دئییل، باشقا آد سئچمه‌لیسینیز. بو آخسامالار سونوجوندا تورهان ۵ آیدیر کیملیک آلا بیلمیر و والیدئینلری بیر چوخ پروبلئملرله اوزلشیب.
ایرانین وطنداشلیق قئیدیاتی تشکیلاتی تصدیقلنمیش آدلاری‌نین لیستینی یاییملایاراق وطنداشلاردان بو آدلاری اوشاقلاری اوچون سئچمه‌لرینی ایسته‌ییر. والیدئینلر طرفیندن سئچیلن آد قئیدیات ایداره‌سی طرفیندن تکلیف اولونان لیستدن کناردا اولدوقدا، سئچیلمیش آد آراشدیریلماق اوچون بو تشکیلاتین (آد کومیته‌سی‌نین) ایداره هئیتینه گؤندریله‌جک و تصدیق ائدیلمه‌دیگی تقدیرده آدین سئچیلمه‌سینه ایجازه وئریلمه‌یه‌جک.
تصدیقلنمیش آدلار لیستینده سیاسی و دینی محدودیتلر و فیکیرلر، بیر چوخ وطنداشی اینسان حوقوقلارینا ضد اولاراق، اوشاقلارینا دینی، ائتنیک و یا مدنی کیملیکلرینه گؤره آد وئرمکدن محروم ائدیر.
#آذربایجان_خبرلری #اوشاق_حوقوقلاری
