اوخول و يؤنتيم باسقيلاري سونوجوندا ايكی اؤیرنجی‌نین اؤلومو
سون گونلر آرزو خاوری و آیناز کریمی آدلی ایکی قیز اؤیرنجی‌نین اوخول و یؤنتیم باسقیلاری سونوجوندا دونیاسینی ديیشمه‌سی خبری یاییلدیقدان سونرا بو خبرلر توپلومو اوزوب و شوک ائدیب.
۹-جو صینیف اؤیرنجیسی آرزو خاوری لی شالوار گئیدیگی اوچون اوخول یؤنتیمی طرفیندن پیس داورانیشا معروض قالیب؛ نهایت بو اضییقلر اونو اینتیهارا سوروکله‌ییب. آرزونون آتاسی بو حادثه‌‌‌نی نقل ائتمکله عدالتین برقرار اولماسینی و اوخوللارداکی بو داغیدیجی گؤروشلره سون قویولماسینی ایسته‌ییب.
ائیتیم ایشچیلری بیرلیگی شوراسی‌نین تلگرام کانالیندا بیلدیریلیب کی، بیر نئچه گون اؤنجه کازرونون دریس کندینده ۱۲-جی صینیف اؤیرتجیسی آیناز کریمی “قوراللارا اویماماق” و دیرناق بویاسی و باش رنگی قویدوغو سببیندن اوخول مودیری طرفیندن زوراکیلیق و تهدیدلرله اوزلشیب. اوخول مودیری حتی آینازین قارداشینا زنگ ائده‌رک اونو اوخولدان قوووب و عائله‌‌‌نین تضییقی ده نهایت، آینازین اینتیهارینا سبب اولوب.
ائیتیم ایشچیلری بیرلیگی شوراسی آچیقلاماسیندا وورغولاییر: ایدئولوژیک و باسقیجی اوخول سیاستی اؤیرنجیلرین گله‌جه‌یینی تهلوکه آلتینا آلیر و اونلاری اؤلدورور.
بو شورا بو جور سیاستلره سون قویماق و اؤلکه‌نین ائیتیم سیستمینده اینسان و بیلگی یؤنوملو پئرسپئکتیوی ایسته‌ییر و فردی آزادلیقلارین قورونماسی‌نین و اؤیرنجیلرین حوقوقلارینا حؤرمت ائدیلمه‌سی‌نین اؤنمینی وورغولاییر.
#ایران_خبرلری #اوشاق_حوقوقلاری
