“لی شالوار” گئیدیگینه گؤره اوخولداکی سورغولامادان سونرا قیز اؤیرنجی اینتیهار ائدیب
رکنا خبر آژانسی، چارشنبه آخشامی، ۱۵ آبان ۱۴۰۳-جو ایلده ری شهرینده آرزو خاوری آدلی ۱۶ یاشلی اؤیرنجی‌نین اینتیهاری‌نین یئنی آیرینتیلارینی یاییب.
بو اؤیرنجی‌نین آتاسی رکنایا بیلدیریب کی، قیزی مکتب یؤنتیمی “لی شالوار” گئییندیگی اوچون اونونلا اوز-اوزه گلدیکدن سونرا اینتیهار ائدیب.
آرزو خاوری‌نین آتاسی رکنایا دئدی کی، قیزی شنبه گونو، ۱۳ آبان‌دا اوخولا گئدیب و داها سونرا اوخول اونا زنگ ائدیب کی،”قیزینیزین نه ائتدیگینی بیلیرسینیزمی؟ رسمی شالوار یئرینه لی شالوار گئییب. او آرتیریب کی، “یاریم ساعتدان سونرا اوخولون مودیری یئنیدن زنگ ائدیب دئدی کی، آرزو ایجازه اولمادان گونورتا ساعت دؤردده اوخولو ترک ائدیب و اوندان خبر آلمامیشیق.”
او، آرتیردی: “بیر ساعت سونرا اوخولدان بیزه زنگ ووروب دئدیلر کی، تئز خسته‌خانایا گئدک. “مئتال قیرینتیلاریندا ایشیم وار و وانت ایله ایشله‌ییرم. بو خبری ائشیدنده هر شئیی آتیب خسته‌خانایا گئتدیم و قیزیمین جسدی ایله قارشیلاشدیم”.
جناب خاوری دئدی کی، بو حادثه‌‌‌دن سونرا بیز پولیس مرکزینه اوخول یؤنتیمیندن شیکایت ائتمیشیک. ایندییه کیمی مکتبدن بیر دفعه ده اولسون بیزه زنگ وورماییب و حالیمیزی سوروشماییبلار.
بو اؤیرنجی‌نین آتاسی دئییب: “اوخول یؤنتیمی‌نین قیزیما قارشی پیس داورانیشی ایلک دفعه دئییلدی. کئچن ایل دوستلاری‌نین چوخ اولماسی، ساچلاری‌نین بیر آز ائشیکده قالماسی کیمی بهانه‌لرله اونو یازدیرماماغا چالیشیردیلار”.
رکنا سایتی‌نین یایدیغی بیلگیلره گؤره، ایلکین آراشدیرمالار گؤستریر کی، بو ۱۶ یاشلی قیز اؤزونو بیر اوین آلتینجی قاتیندان آشاغی آتاراق هفتم تیر خسته‌خاناسینا کؤچورولدوکدن سونرا دونیاسینی ديیشیب.
ائیتیم ناظرلیگی‌نین یئتکیلیلری هله‌لیک بو خبره تپکی وئرمه‌ییبلر.
#اوشاق_حوقوقلاری #اینتیهار
