قادینلارین ابدی بورجو

قادینلار همیشه کیشیلرین خوشونا گلمیه چالیشیببلار. “یاخشی گؤرونوم، دادلی بیشیریم، سکسی اولوم، کیرپیک قویوم، عطیرلنیم، ساچیمی رنگلییم، باشیمدا آغاج دوزلتدیریم و …”
ندن؟
ائولیلیکله باغلی بوتون مصلحتلر قادینلارا عنوانلی دیر: ارینه یاخشی باخ، یئمگینی حاضیر قوی، چایینی واختیندا دمله، پالتارلارینی یو، اوتوله، “لازیم گلسه تومان مایکاسینی باغرینین باشیندا ساخلا، اؤپوب گؤزونون اوستونه قوی و…”
هر شئیی آنلاماق اولار. بیر قادینین عؤمرو بویو، بیر باشقاسینین آلت پالتارینی یوماغا محکوملوگونو آنلاماق چتیندی. بونو بورج کیمی قادینا یوکلییبلر.ارینین تومانینی یوماق بورجو وار هر قادینین، اوغلونون دا، نیه؟ بیری بوسؤالا عاقیللی بیر جواب یازسین.
بیرآن عکسینی تصور ائدین. هر کیشی اؤز قادینینین آلت پالتارینی یوماغا بورجلودو دییک. نئجه اولدو؟
غریبه حیسدی یوخ؟ آغیلا سیغمازدی. کیم معینلشدیریب بو روللاری؟
“کیشیلر معده سیله سئویشیرمیش. قارنینی توخ ساخلا، والسلام، اساس قاریندی”. آق ساققلارین قادینلارا وئردیگی ان عمده توصیه دیر. قادین بیر آنلیق فیکره گئدیب دوشونمه ییب، ائله ائشیدیب ، عمل ائتمگه چالیشیب. آدام بیر قورخار. بئله بیر قارین قولو سنین نیینه لازیم دیر؟ قارینلا مسئله حل اولسایدی، اؤلکه ده یئکه قارین دؤلت چالیشانلارینین بیر فایدالی ایشینی گؤرردیک. قارینلا اولمور، عکسینه. گؤردوز بیر آجلیق آکسیاسی ایله اینسانلار نلر ائدیر. مسئله نی سیاسی لشدیرمدن داوام ائدک.
پهووو… نئجه اولا بیلر، بیر وارلیغین سئوگیه باغلی بوتون مسئله لری قارین و اونون اطرافیندا جمعلشسین. بئلدن آزجا یوخاری، بئلدن آزجا آشاغی و ایش تمام دیر. سئوگی حاضیردی!
بئله سئوگی اولار؟ اولماز. اونا گؤره ده اولمور. اونا گؤره ده آئیله لر پروبلم ایچینده دی. آنلاشا بیلمیرلر، ایللر بویو بیرگه یاشییرلار، اما یاخینلیق، دوستلوق، یوخدو. هر کس دیگریندن نیسه گیزلدیر. ارله-آروادین بیر گیزلین حیاتی وار، هر ایکیسی بیربیریندن گیزلین ایشلر چئویریر. تومان، قارین و مکانیکی سکسله روحسال بیرگه لیک اولماز. بیرگه لیک اولور اولماسینا، بیرگه یاشاییش دییک، اما ایچ بیرگلیگی اصلا.
بوتون مصلحت لر قادینین کیشینی الینده ساخلاماسینا حسابلیدی. کیمی ایسه الده ساخلاماغا چالیشماق معناسیزدی.گئدن گئدیر. فیزیکی گئدیش اولماسادا، روحا مطلق گئدیر. بلکه نیینسه خطرینه مجبورا قالیر، قالماسی اوچون سببلری اولور، اما سببلرین هئچ بیرینده اونونلا، اری- آروادیلا قالماق ایستگی اولمور.
بوتون مصلحت لر یانلیشدی. مصلحت مصلحتدیرسه، کیشیلره ده آئیددی. اؤنملی مسئله: قارشینداکی اینسانین کاراکترینی نظره آلماق. فرقی یوخدو کیشی، یا قادین موناسیبته یالنیز اؤز کاراکترینله اؤکوز کیمی دورتولسن، آلینمایاجاق. اؤزاؤزونله سئوگیلی دئییلسن، باشقاسیله سئوگیلیسن اونا گؤره. موناسیبت ایکیلی حادیثه دی. بو سبب دن قارشینداکینی نظره آلماغا بورجلوسان.
آمماسی وار! آمما اودور کی، بو، هئچ ده بوتون حیاتینی، داورانیشینی، دوشونجه و ایستکلرینی اونا حسابلامالیسان دئگیل. خیر. اؤزللیگینی تیتیرن آدام هئچ کیمسه ماراغلی گلمیر. سئوگیلیه نیه ماراغلی اولسون؟
“نظره آل” دیینده چوخ بؤیوک مطلبلردن دانیشمیریق. مثلا، سئودیگین کس کیتاب اوخوماقدان ذوق آلیر، سن ایسه کیتابلا ماراغلانمیرسان، عمرونده بیرجه دفعه اونا کیتاب هدیه ائتممیسن اوندان سنه باغلانماسینی گؤزلمه. اونون اوچون ان دیرلی شئیلردن بیری سنین اوچون ان دیرسیز شئیلردن بیریدیرسه، سیزین روحسال باغینیز یارانمایاجاق. بو قادینا دا، کیشیه ده کئچرلیدی. ایستییرسن گؤزل پئنجک گئیین، ایستییرسن فیتنس دن چیخما، ان سکسی عطیرلری وور، ان دادلی یئمکلری بیشیر، ان گؤزل گول دسته لرینی آل، خیری یوخدو. مسئله نین “اؤزللیگینی ساخلاماق” طرفی ایسه بئله دی: اؤزون اوخوماغی سئومیه بیلرسن، اوخوما، آنجاق نظره آل کی، اونون یانیندا، “آیشی کیتابی بوش وئر” تیپلی جومله لر قورماق بؤیوک، یومشاق دئسک، سهودی. بو دوستوروموناسیبتینده باشقا مسئله لره ده آئید ائده بیلرسن. کیمسه نین کیمسه قارشیسندا بورجو یوخدو. آمما عهده لیگی وار. اینسان جمعیتینده یاشاییریق، باشقالاری ایله زنجیرواری اونسیتیمیز وار. هر کس اؤزاؤزونو عهده لیگینه حاضیرلاماق گوجونده دی. ایدمان کیمی بی شئیدیر. مشق ائدیرسن، پروقرام قوروسان، آلینیر. آمما و لاکین بوعهده لیگین ایچینده کیمینسه آلت پالتارینی ابدین یوماق، کیمینسه قارنینی ابدین دویورماق شرطی یوخدو. چونکو اوتوز ایل کئچجک و سن قازان قیراقیندا یئمگی قاریشدیرا قاریشدیرا بوتون حیاتینی گؤز اؤنونه گتیریب عذاب ایچینده قیوریلاجاقسان .
یازار: قادین کیمی
کؤچورن: تورک قادینلار مرکزی