دره شهرده ۱۷ یاشلی قیز آتاسی طرفیندن ناموس مسئله‌سی نه‌دنی ایله اؤلدورولوب
ایلام ایالتی‌نین دره شهر شهریندن اولان ۱۷ یاشلی “مبینا زینی‌وند” آدلی قیز آتاسی طرفیندن سلاحلا و ناموس آدلاندیریلان مسئله اوزوندن قتله یئتیریلیب.
حوقوق ساوونما تشکیلاتی‌نین یایدیغی بیلگیلره گؤره، ۵ شهریور ۱۴۰۳ بازار ائرته‌سی سحر ایلام ایالتی‌نین دره شهر شهری‌نین ماژین ماهالی‌نین گرزلنگر کندیندن اولان مبینا زینی‌وند اؤز ائوینده آتاسی طرفیندن اوو توفنگی ایله اؤلدورولوب.
بیلگیلی قایناغین سؤزلرینه گؤره، رحیم‌خان آدلی تقصیرلندیریلن شخصین ۵۶ یاشی وار و مبینانی ناموس مسئله‌سی اوزوندن قتل ائدیب. بو قایناغا گؤره، ۱۷ یاشلی بو یئنی‌یئتمه قیز بیر اوغلانلا موناسیبتده اولدوغو اوچون اؤلدورولوب. مبینانین آتاسی قیزی‌نین سئودیگی آدامین عائله‌‌‌سی ایله آرالارینداکی عائله ایختیلافلارینا گؤره موناسیبتلرینه سون قویماق ایسته‌ییب، لاکین بو مسئله مبینانین آتاسی طرفیندن اؤلدورولمه‌سی ایله سونلانیب.
ایران مئدیاسی تقصیرلندیریلن شخصین جینایتی تؤرتدیکدن بیر نئچه ساعت سونرا حبس اولوندوغونو بیلدیریب.
ایران‌دا ایسلام جینایت قانونونون ۳۰۱-جی ماده‌‌سینه اساساً آتا قيوم اولدوغو اوچون قصاص ایله جزالاندیریلا بیلمز. او، فیدیه اؤده‌مه‌یه و حبس و جریمه کیمی جزالارا محکوم ائدیله بیلر.
