اوشاق ادبیاتی ذکیه ذولفقاری آلمانیا دا اوشاقلارین آد گونلری نئجه قید اولور
آنار و آندانین (ائکیز ایکی قارداش نوه‌لریمین) آلتی یاشلاری دوغوم گونو قوتلاماسی(آلمان لایپزیگ):
نئچه گون قاباق آنار و آندانین آتاسی احسان، اونلارین دوستلاری و اوشاق باغچاسی هم‌کلاسی‌‌لرینین آتا -آناسیندان کتبی رضایت آلیب، اونلاری دوغوم گونونه دعوت ائتمیشدی.
دوغوم گونو بیر چوخلو قوولوق پوفله‌ییب ائوین حیطینین اورتاسیندا پالتار شریطی‌نین دمیریندن آسدیلار. بیر میز قویدولار اؤنونه، زرلی بیر کاغاذ یاپیشدیردیلار. ایکی جوره یونگول و سویوق یئمک (سالاد کیمی) حاضیرلاییب میزین اوستونه قویدولار.
حیطین دوره‌سینه آز سایی‌دا صندل دوزولدی. بیر طرفده ترامپولین (هوپپاناق اوچون)، بیر طرفده بسکتبال توری, بیر یاندا اوست اوسته دوزولموش بوش کنسرو قوتولاری (هدف آلیب توپ نان وورماق اوچون) و باشقا ساده اوشاق اویونلاری واریدی.
دعوت ائلدیکلری ساعاتدا اوشاقلارین آنا و یا آتالاری اوشاقلاری دوچرخه‌یله، چرخ بؤرکو باشیندا گتیریب قویدولار، گئتدیلر.
چوخ اؤنملی نکته‌لر بو دوغوم گونو مراسیمیندن:
اوشاقلار چوخ ساده و راحات گونلوک پالتار گئیمیشدیلر.
ایکی دانا بالاجا و چوخ ساده کیک آلینمیشدی. کیکین اوستونده آنار- آندانین نه عکسی واریدی نه ده آدی یازیلمیشدی، نه کارتونی بیر کاراکتر واریدی، نه رنگلی بزکلی تزئیین.
تم تولد کیمی اجباری بیر رنگ و یا طرح تحمیل اولمامیشدی.
باهالی پرنسس کیمی دونلاردان، کارتونی قهرمان لار پالتارلاری، ساچ دوزتمک، رنگلی سوسلمه‌لردن، اوغلانلارین توک ژلی، قیزلارین ماتیک و یا اکلیل لی بزک لردن، باهالی کادولاردان اثر یوخویدو.
گئنلده بورادا، اؤزگه اوشاقلاردان عکس سالماق یاساقدیر. بیز عائله‌لریندن ایزین آلیب پایلاشماماق شرطیله بیر ایکی عکس سالدیق.
موسیقی رقص و یا قولاق کار ائدیجی بیر بانددان خبر یوخویدو.
ایضافه، لزومسوز و خرجلی هر هانسی بیر آباردیجی سوسلندیرمه‌لره احتیاج یوخودو.
بیز؛ آنار و آندانین عائیله سی جمعی ۵ نفر بؤیوک آدام واریدیق. بیزایسه چوخ ساده و راحات پالتاریلا اوردا اشتراک ائتمیشدیک.
بؤیوکلرین دیقت و تمرکزلری بوردایدی کی اوشاقلار بیرلیکده خوش کئچیردیب گوزل و خاطیره‌لی گون یاشاسینلار.
ایراندا بیزیم اوشاقلارین دوغوم گونو جشنلرینی خاطیرلاییب، مقایسه ائتمکده آدام بوقدر فرقلره حئیران قالیر.
