اصفهاندا بیر قادینین حبسی؛ مریم خلیلی بلیرسیز بیر یئره کؤچورولوب

ایرانین اینسان حاقلاری مئدیاسی جوما گونو، ۲۵ اسفندده مریم (مرضییه) خلیلی آدلی قادین وطنداشین حبس ائدیلمه‌سی باره‌ده بیلگی یاییب.

هرانا اینسان حاقلاری تشکیلاتی‌نین راپورونا گؤره، خانیم خلیلی جوما آخشامی، ۲۴ اسفندده حبس ائدیلیب و اونون ساخلاندیغی یئر و اونو ساخلایان قوروم حاقیندا بیلگی یوخدور.

بو وطنداشین حبسی ایله باغلی “توانا” سایتی یاخینلاریندان بیرینه ایستناداً یازیب کی، اؤتن گونلرده چادورلو بیر قادین مریم خلیلی‌یه ساتاشیب و اونون حبسی‌نین بونونلا باغلی اولماسی احتیمالی وار.

خانیم خلیلی داها اؤنجه دفعه‌‌لرله عدليه‌‌ اورقانلارینا چاغیریلیب و دیندیریلیب و گیروو ایله سربست بوراخیلیب.

اینستاگرام حسابیندا تنقیدی یازیلار یایدیغینا گؤره او، ایسلام جمهورییتی‌نین محکمه‌‌ سیستمی طرفیندن تعقیبلرله اوزلشیب و سیستمiه قارشی تبلیغات آپارماقدا، رهبرلیگی تحقیر ائتمکده و موقدس شئیلری تحقیر ائتمکده گوناهلاندیریلیب.

اونون محکمه‌‌سی ۱۴۰۳-جو ایلین اردیبهشت آییندا اصفهان اینقیلاب محکمه‌‌سی‌نین شؤبه‌لریندن بیرینده کئچیریله‌جک.

اؤتن آیلاردا ایسلام جمهورییتی‌نین گوونلیک قوروملاری سوسیال شبکه‌لرده تنقیدی یازیلار یازان وطنداشلاری گئنیش شکیلده حبس ائدیب.

بو حرکتلرین سون حاللاریندان بیرینده، بازار گونو، ۲۰ اسفندده باتی آذربایجان عدليه‌‌سی‌نین باشچیسی، بو ایالتده بیر نئچه سانال اورتامی فعالینین، اینانج و دینی اساسلاری آلچالتماق، ائله‌جه ده ائتنیک و دینی آیری-سئچکیلیک آدلاندیردیغینا گؤره حبس ائدیلدیگینی آچیقلاییب.
#قادین_حوقوقلاری #مریم_خلیلی
Henüz