مدینه گولگون – ائلیمیزین شاعیر قیزی
مدينه گولگون – اکبرزاده ، چاغداش آذربایجان ادبیاتی نین گؤرکملی شاعیره سی 1302 جي ايلده نورالله اكبرزاده نين عائله سينده آنادان اولوب، 16 ياشيندا ايكن اردبيله كؤچوب، عائله سي ايله اردبيلده ياشايير. 1320 جي ايللردن 1325 جي ايللرده وطنيميزده آزادليق نفسي آچيلاركن، مدنيه نين شئعر ديلي آچيلير و نفس آلير و آذربايجاندا يارانان دئموكراتيك ميللي حركاتا قاتيلير. 1324 جي ايلدن تبريزه گليب، ميللي حركته داياق اولماق اوچون فعالجاسينا اجتماعي ـ سياسي حركت لرده اشتراك ائدير.
مدينه گولگون او سيرا شاعيرلردن دير كي ميللي حؤكومت ايلينده بير الينه سيلاح و بير الينه قلم آلاراق، خالقي نين آزادليغي و سعادتي اوغروندا دايانمادان چاليشير و مبارزه ني ايره لي آپارير. آذربايجان دئموكرات فرقه سينين فعال عضوو و آذربايجان قادينلاري نين اؤنجوسو كيمي چاليشير. عيني حالدا، گؤزه ل و ميللي شئعرلريله ده خالقيندا هيجان يارادير و اونلاردا اينام بسله يير. اونون ايلك شئعرلري تبريزده ياييلان « وطن يولوندا » درگيسينده چاپ اولوب، هامي نين ماراعيني قازانير. او بو ايللرده يارانان « شاعيرلر مجليسي » و « يازيچيلار و شاعيرلر جمعيتي » نين فعال عضوو اولور. او يازديغي شئعرلرينده خالقي نين ايستك و آرزيلاريني ديله گتيرير. او همين ادبي فعاليتنه گؤره تبريز « 21 آذر » مداليني سينه سي اوستونه وورور. آمما نه يازيق كي ميللي حؤكومت بير ايلدن آرتيق عؤمر سورمه ييب و مدينه ده مينلرجه آذربايجان خالقي كيمي سورگونه معروض قالير و آذربايجان جمهوروسونا پناه آپارير.
مدينه بير آن بئله درس و تحصيلدن دايانماييب، فورصت اله گتيرديكده يونيوئرسيته يه داخيل اولوب، تحصيليني داوام وئرير. او 1952 جي ايلده ادبيات ساحه سينده يونيوئرسيته ني بيتيرير.
مدینه گولگونون اثرلری
مدينه خانيمين شئعرلري توپلانيب و 1950 جي ايلده ايكي شئعر دفترينده چاپ اولور :
1 ) تبريزين باهاري
2 ) ساوالانين اتك لرينده
1988 جي ايلده چاپ اولان دؤرد جيلدليك « جنوبي آذربايجان ادبيياتي آنتالوژيسي » كيتابيندا مدينه نين او تاريخه قده ر 20 جيلد كيتابي نين چاپ اولماسيندان دانيشيلیرر. بو كيتابلار بونلاردير :
1 ) تبريزين باهاري
2 ) ساوالانين اتك لرينده
3 ) صولحون سه سي
4 ) ياديگار اوزوك
5 ) پروانه
6 ) تبريز قيزي
7 ) فيريدون
8) خاطيره لريمين نغمه سي
9) يورا بيلمز يوللار مني و باشقالاري.
مدينه نين نئچه كيتابي ايراندا عرب اليفباسينا كؤچوروله رك چاپ اولموش و درين قايغي و نيسگيل ياراتميش و آلقيشلانميشدير. بونو دا اونوتماياق كي مدينه نين شئعرلري سووئت خالقلاري نين ديللرينه چئوريلب، بوندان علاوه نئچه ـ نئچه اوروپا و آفريقا ديللرينه ده ترجمه اولوبدور. مدينه سووئت اتفاقيندا « لنين يوبلئي مداليني » ، هابئله « شرف نيشاني » مداللاري ايله تلطيف اولموشدور.
هامي ميز بيليريك مدينه گولگون خانيم، آذربايجانين بؤيوك شاعيري بالاش آذر اوغلونون حيات يولداشي دير.
يئنه پرواز لانيب خياليم منيم
يئنه شعره دوندو سؤزوم اي وطن
سنين داشيندا دير، اوز پاغيندادير
بو سؤنمر آلووؤم، گؤزوم اي وطن
***
ده رين بير عمّان سان هايلي، هارايلي
مقدس آناسان شيرين لايلايلي
گئنيش بير ساسان اؤلروزلؤ، آيلي
سن وارسان بو كولمر ديزيم اي وطن
مدینه گولگونون اثرلری نین آراشدیرماسی
شعرلري، ماهني لاري دورنا قاتارلاري تك دوغما ائل ـ اوياسينا قاييدان وطن پرور، ائل سئوه ر شاعير مدينه گولگون، اجباري مهاجرت ده، ائل ـ گونوندن اؤزاق دوشسه ده، يئنه اؤز شعري ايله يوي ـ ياشا چاتديغي يئر ـ يوردو ترنّم ائدير. او، اوز يوردونون، دوغما تورپاغين اؤولادي دير :
من كيمم؟ بودوغما يوردون اؤولاردي
گوجو بو تورپاقدان آليرام هردم
من نديم؟ آرزومنون قوشاقانادي
من بوقانا دلار لايوكسه له جيم ]
آنا تورپاقدان گوج آليب، توكنمر قدره ته ماليك اولان شاعيرين ايسته يي، آرزوسو نه دير؟
ده نه دولموش سونبول تك
بارلانماق ايسته ييره م.
ائلين محّبتيله
وارلانماق ايسته ييره م.
***
داغ اولماق ايسته ييره م
ذيير وه مه قاتال قوتا
ائليمدن، وطنيمدن
صحبت آچيم من اوتا.
مدينه، عصيان دان تؤره نميش شاعير، اؤزو ده عصيانا چئوريلمه فيكرينده ديير، تا ائلین قوللاریندان زنجيرلري قيريب، آچين:
عصيان اولماق تيسته ره م
زنجيرلي بيله كلره.
اوسيد اولماق ايسته ره م
انتظار اوره كلره
او، انسانلارين اوره يينه سيغينماق، انسان قلبينده ابدي مسكن تاپماق ايسته يير:
سنين، اونون قلبينده
من يورد سالماق ايسته ره م
خلقيمله، وطنيم له،
من او جالماق ايسته ره م
گولگون ايسته يير خئيرخواهليق و ياخشيليق آبیده سينه چئوريلسين. هر شئيه فايدا وئرسين، هامييا خئير يئتيرسين :
ياغيش اولماق ايسته ره م
تارلالارا تؤكولم
چينار اولماق ايسته ره م
يوللار اوسته أكيلم.
**
ايسته ره م گونش اولام
ائولره نور سه يم من
آنجاق شاعيرين آرزولاري آراسيندا أن علوي سي، أن ضرروري سي آزادليق و یولو، دؤیوش یولودور :
آرزولارچئشيد ـ چئشيد
آرزولار رنگ ـ رنگ اولور
آرزو وارهاي هارايلي
آرزو وار كؤوره ك اولور
منيم آزادليق آرزوم
هر آرزومدان اولودور
من آرزومون عسكري
يولوم دويوش يولودور.
آذربايجان شاعيري اؤز ائلينه، دوغما اؤلكه سينه سيخ باغليدير. شاعير صميمي سؤز لرله اؤز دوغما وطنيني لطيف و گؤزه ل بديعي شكيلده ترّنم ائدير :
وطن سنين سال قايانا
اوز داشينا قوربان اولوم
هامار يوالارين بير يانا
يوخوشونا قوربان اولوم
**
سحرينه، آخشامينا
دادلي شيرين كلامينا
توكنمه ين الهامينا
آلقيشينا قوربان اولوم
دوغما يوردوندان آيري دوشمه، شاعيرين قلبيني حسرت آتشي ايله داغلايير :
آيريليق داغ چكدي منه
وطن دييب دوز دوم يئنه
سنين آنا شفقيتنه
قارغيشينا قوربان اولوم
شاعير گولگون « منيم شعريم » عنوانلي اثرينده، اؤز شعرينين خصوصيّت لريني ايضاح ائدير :
غضبي شيمشك لردن
آتشي اوره كلردن
دؤزومو قايالاردان
جوشماني دريالاردان
شفقتي آنالاردان
آليبدير شعريم منيم
***
ايلك نغمه ني آنامدان
اوميديني اينان دان
گوجو دوغما دياردان
آليبدير شعريم منيم.
منیم نغمه لریم
مدینه گولگون بوتون شعر دفترلرینده آناسینا باغلی اولان کیمی، وطنینه و خالقینا باغلیلیغینی گؤسته ریر. اونون شعرلری قیریلماز بیر زنجیر کیمی بو باغلانتیلاری جانلاندیریر.گولگون « منيم نغمه لريم » عنوانلي شعرينده يئنه ده اؤز صنعتي حاقدا سؤز ـ صحبت آچير. او، شعرينين مختلف وظيفه لريندن دانيشير و اينجه مسأله لره اشاره ائدیر. « عؤمور معناسيني » اؤز نغمه، اوز شعرينده گوره ن « نغمه سي تشنه انسانا سو اولان » ، شعري آغيرزلار دا نوغول كيمي دادان، شاعيره قاناد وئره ن نغمه لر، بير خالقين اوره ك سؤزلرينين ترجماني اولور :
هر بير كيچيك وؤرغونوزدا هواسي وار وطنين
سيزي باش سيز كولك لر أيه ر مي چتين ـ چتين
ترجماني اولدو نور بير خالقين، بير ملتين
اي منيم گاه آغلايان، گاه گولن نغمه لريم.
ناشيلار قيمت وئرمه سه ده، اصيل شعير مجلس لري دولاشير، ائل سيناغيندان باشي اوجا چيخير و اؤز شاعيريني گؤيلره يوكسه لدير.
شعر قارتال اولماسادا، اؤز قانادينا آرخالانان، بير خيردا جاقوش اولماليدير. او، شاعيرين كؤنلوندن كي محبّت له ياناشي اؤچماليدير :
سن بير قارتال يا بير طرلان اولماسان دا
اوجا داغلار اوسته قاناد چالماسان دا
چينار اولوب يئره كؤلگه سالماسان دا
كوريه قوش اول اؤز قانادين اولسون آنجاق
كؤنلومده كي محبّت دن اولما اوزاق.
شاعير زر و زور صاحب لرينه يالتاقلانماقلا يوخ، اؤز گوجونه آرخالاناراق يوكسه لمه ليدير، بو يوكسه ليش، آستا ـ آستا، بير اوشاغين اؤز آياغي اوسته دورماغي تك اولسادا، يادلاردان، اجنبي لردن ياردیم ديله مكدن يئي دير :
اؤز گوجونله سن اوجالسان تورپاق اوسته
سانارام كي، قويدوم داغي من داغ اوسته
مين زحمتله اوشاق قالخار آياق اوسته
ياد ائللردن ديله مه ديم اصلاكؤمك
ياخين دوستوم بير قلم دير، بيرده أمك
بو، اوز قانادينا آرخالانان، يادلاردان يارديم ديله مه ين كؤرپه جه قوش، اؤز گوجو ايله تورپاق اوسته اوجالان موجود معجزه لر ائدير، خارقه لر يارادير، گاه جبهه لرده عسكر كيمي دويوشور، گاه دا قاپيلاردان سحر موژده چيسي كيمي داخل اولور و وطن تورپاغيندا سيلينمز و ابدي ليك ايزي قالير :
گاه جبهه ده هاراي چكدين عسگر كيمي ،
گاه دا آچدين قاپيلاري سحر كيمي،
يوللار كئچن داغلار آشان كه هر كيمي،
قوي بو وطن تورپاغيندا ايزين قالسين .
اؤز نفسين، اؤز مئيوه سي، آلنين ته ري؛ اوره كلري اوولايان، ائلدن ـ ائله گئده ن نغمه لره چئوريلير و ائل ـ اوبا ياد داشيندا هميشه ليك يئر سالير :
اوره ييمين ميوه سيدير هر اثريم
آز آخمادي ورق اوسته آلين تريم
قانادلانيب گه زمه سيدي نغمه لريم
ياد ائتمزدي اوبا مني، اويماق مني
اونو داردي وطن مني، تورپاق مني
حيات كوره لرينده قيزاريب، سوواريلميش پولاد كيمي يركيميش شاعيري داها هئچ بير چتين ليك يورا ييلمير :
گاه آراندا، گاه داغدايام،
گاه چمنده، گاه ياغدايام ،
ياخيندايام، اوزاقدايام ،
يورا بيلمز يوللار مني .
***
يوللار دؤنه ر بير كتابا،
ورقله رم اوبا ـ اوبا،
تايلاشارام هر عذابا،
يورا بيلمز يوللار مني.
هر شرايط ده، هر موقعيّت ده شاعير گولگون و وقاريني محافظ ائدير؛ چونكي حيات سينا قلاري، دييريليين ائنيش ـ يوخوشلاري اونو بيشيريب. او، تارسيمي تك تاريم دارتيليب و اينجه ليب، اونا ده ين أن كيچيك ضربه، نغمه يه چئوريلير :
گاه قوشلارلا ياريشارام
گاه سئللره قاريشارام
ده ره ائنيب، داغ آشارام
يورا بيلمز يوللار مني
**
نغمه دولو بير اوره يم
گاه جوشغونام، گاه كؤوره يم
بير اوميدلي گله جديم
يورا بيلمز يوللاري مني.
مدينه قورقود آتانین، تومروس آنانين دوغما قيزي دير. او، تومروس كيمي جسارتلي، قورقود كيمي حكمت ليدير.
بابام قورقودون سازييام
نه نه م تومروسون قيزييام
يورا بيلمز يوللار مني.
نه اوچون آغير يوللار شاعيري يورا بيلمز؟ بويورولمازليق روحونو اونا كيم ياغيشلاييب؟ قوي بو سرّي مدينه نين اؤزو آچسين :
ائل آرخا مدير دار آياقدا
بير معنا وار ياشاماقدا
دوغولدوغوم بو تورپاقدا
يورا بيلمز يوللار مني
خلقينن أن اعجوبه سي انسان دير. انسان يارادير، حياتا جيلوه وئرير. انسان تربيه لنير، مدني لشير و ملك لردن اوستون اولور و كوبود لاشديقدا آلچالير، ابليس دن ده شرير اولور. گئنيش طبيعت بير انساندا يئرله شير. لاكين انسان مجرّد حالدا، طبيعتي تشكيل ائده ن عنصرلره به نزه مير. شاعير گولگون « من انسانم » عنوانلي شعرينده بو مقوله ني هر طرفلي ايضاح ائدير :
مني نه بنفشه يه
نه لاله يه اوخشادين
نه دومانا، نه چنه
نه كولگه يه اوخشادين
ـ ـ ـ ـ ـ ـ ـ ـ ـ ـ ـ ـ ـ ـ ـ
او، هئچ شئيه به نزه مك ايسته مير چونكي :
دئمه يين كي گونشدن
آلديم اودو، آتشي
انسانام، بو تورپاغين
منم اصيل گونشي
ـ ـ ـ ـ ـ ـ ـ ـ ـ ـ ـ ـ ـ ـ ـ
انسانام، انسانام من
گئچه گونش باتسادا
من يانارام هر آخشام
حياتين، گؤزه ل لييين
كئشييينده دورموشام
يارادان انسانام من.
گولگون همين شعرده هر زادي اؤزوندن، داها آيدين دئسه ك انساندان آسيلي سانير ( اؤزو بشردن بير اؤرنك اولماقلا ) همين قيكير عصرلر يويو ادبياتيميزا حاكم اولموش عرفاني خاطيرلايير :
مثلاً :
« قمر چهرم، پريرويم، ظريقم، شوخم و شنكم
سمن بويم، كل اندامم، سهي سرو خرامانم
كلم، ريحانم، اشجارم، عبيرم، عنبرم، عودم
دُرم، مروارم و كانم، عقيقم، لعل و مرجانم
چراغم، شهعم و نورم، ضياي يلدزم، شمسم
هزارم، بلبلم، كبكم، نسيمي خوش الحانم »
بو شعر عمادالدین نسیمی دن اولورسا دا، گولگونون شعرلرینده باشدان دئییلیر.
شاعير گولگون اؤز اثرلرينه بير تنقيد كيمي باخاراق، اينانير كي، ياراتديغي ادبّيات عصرلر بويو ياشايا جاثدير و ياراديجي سيني اؤلمز صنعت خادمي كيمي زامان ـ زامان تانيتديرا جاقدير
وطن تورپاغيندا قاينار بولاغام ،
آرخام اوجا داغدير، اؤنوم گؤي مئشه .
كيم دئيير دونيادا من بير قوناغام،
گله جك نغمه لي سسيم هميشه.
**
شيرين بير لايلايام، دوغما بير سسم ،
هر گون بئشيك لردن اوجالاجاغام ،
ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ
**
اينانما سوسدورا زمان قلبيمي،
اينانما دئسه لر اؤله جه يم من .
بو ائله، بويوردا كورپه قوش كيمي ،
هميشه باهارلا گله جه يم من.
