اورميه ده كويير فعاللاريندان الهام چوبدار حبس ائدیلیب
ایرانین اینسان حاقلاری قایناقلاری‌نین وئردیگی بیلگیلره گؤره، اورمیه‌نین گؤی قورشاغی ایجماسی‌نین فعاللاریندان اولان الهام چوبدار اوچ ایللیک حبس جزاسینی چکمک اوچون گوونلیک گوجلری طرفیندن حبس ائدیلیب.
هنگاو حوقوق ساوونما تشکیلاتی اؤز قایناقلارینا ایستناداً بو ایل بهمن آیی‌نین سونوندا ایرانداکی جینسی آزلیقلار ایجماسی‌نین فعاللاریندان بیری اولان الهام چوبدارین حبس اولوناراق اوچ ایللیک جزاسینی چکمک اوچون اورمیه مرکزی حبس‌خاناسی‌نین قادینلار شؤبه‌سینه کؤچورولوب.
۲۶ یاشلی اورمیه‌لی الهام چوبدار، ساره صدیقی همدانی ایله بیرگه ۱۴۰۱-جی ایلین یاییندا اورمیه اینقیلاب محکمه‌‌سی طرفیندن “ائش جینسللیگین تبلیغی” و “مسیحیلیگین تبلیغی” یولو ایله “یئر اوزونده فیتنه-فساد تؤرتمک” و “ایسلام جمهورییتینه قارشی مئدیا ایله ایلیشگی” اتهامی ایله اعدام جزاسینا محکوم ائدیلیب.
یوخاریدا آدی چکیلن حؤکم داها سونرا عالی محکمه طرفیندن لغو ائدیلدی و الهام چوبدار ۲۲ اسفند ۱۴۰۱-جی ایل بازار ائرته‌سی گونو بیر میلیارد تومن گیروو قارشیلیغیندا و محکمه‌‌یه قدر مووقتی اولاراق سربست بوراخیلدی.
الهام چوبدار بو ایلین پاییزیندا ۳ ایل حبسه محکوم ائدیلیب و جزاسینی چکمک اوچون بو ایلین بهمن آییندا حبس ائدیلیب و حاضردا اورمیه مرکزی حبس‌خاناسی‌نین قادینلار شؤبه‌سینده‌دیر.
#آذربایجان_خبرلری #جینسی_آزلیقلار
