نسیم سلطان بیگی‌نین حبسده قالما مدتی ۷ بهمنه قدر اوزادیلیب
اوین حبس‌خاناسیندا حبسده اولان ژورنالیست نسیم سلطان‌بیگی‌نین آناسی ایران جلیلی قیزی‌نین گؤروش و ایله‌تیشیم قاداغاسی‌نین اوزادیلدیغینی آچیقلاییب. خانیم جلیلی اینستاگرام صفحه‌‌‌سینده یازیب: قیزیم نسیم سلطان‌بیگی‌نین گؤروش و ایله‌تیشیم قاداغاسی ۷ بهمنه قدر اوزادیلیب.
بو حبسده اولان ژورنالیستین آناسی یازیب: اوین حبس‌خاناسیندا بعضی قادین محبوسلار اوچون آچیلیشلار اولسا دا، بعضیلری‌نین ایله‌تیشیم و گؤروشلری اولونسا دا، قیزیم نسیم سلطان‌بیگی‌نین گؤروش و ایله‌تیشیم قاداغاسی هله‌ده واردیر.
بو قاداغالاری قدار آدلاندیران خانیم جلیلی یازیب: بو عدالتسیز قرار دی آیی‌نین سونونا کیمی داوام ائتمه‌لی ایدی، آما نسیم اوچون داها بیر هفته اوزادیلدی کی، داها اوزون مدت قیزیمین سسینی ائشیتمکدن، اوزونو گؤرمکدن محروم اولاق.
خانیم سلطان‌بیگی اوچون یئنی قاداغالار ۶ دی گونو تلفونلا ماهنی اوخوماسی و بیر قروپ محبوسون حبس‌خانایا باش چکرک محکمه اورقانلارینا اعتراضی ایله باغلی اولاراق قویولوب.
اولوسلارآراسی ژورنالیستلر فدراسیونو حبسده اولان اوچ قادین ژورنالیسته محدودیتلرین تطبیقیندن سونرا آچیقلاما یایاراق، اوین حبس‌خاناسیندا الهه محمدی، نیلوفر حامدی و نسیم سلطان بیگی‌یه قارشی گؤرولن جزا تدبیرلرینی کسکین شکیلده پیسله‌ییب و ایران حاکیميتینی بوتون محبوس ژورنالیستلری آزاد ائتمه‌یه چاغیریب.
#ژورنالیستلیک_جینایت_دگیل #نسیم_سلطان‌بیگی
