محکمه: نرگس محمدی‌نین یایدیغی ایچریکلر اؤز طرفیندن دئییل
ایسلام جمهورییتی عدليه‌‌سی‌نین سؤزچوسو سیاسی محبوس، نوبل باریش اؤدولونون صاحبی نرگس محمدی‌نین یایدیغی ایچریکلر ایله باغلی وئردیگی آچیقلامادا ادعا ائدیب کی، سانال اورتامدا یاییلان ایچریکلرین هئچ بیری اونون طرفدن سؤزوگئدن محبوسلا باغلی دئییل.
مسعود ستایشی چارشنبه گونو ۲۹ آذرده مطبوعات کونفرانسیندا خانیم محمدی‌نین خاریجی مئدیایا وئردیگی موصاحیبه‌لری ایله باغلی دئییب: حبس‌خانالاردان الده ائتدیگیمیز سندلی راپورلار و بو ساحه‌‌‌ده گؤرولن تئکنیکی و بیلیرکیشی تدبیرلرینه گؤره، سؤزوگئدن محبوسون حبس‌خانادا هئچ بیر سس فایلی یاییلمییب و سانال اورتامدا یاییلان ایچریکلرین هئچ بیری بو محبوس ایله باغلی دئییل.
بو عدليه یئتکیلی ادعا ائدیب کی، بو ایچریکلر “باشقا اینسانلار طرفیندن ائدیلیر و اونون حیات یولداشی طرفیندن ائدیلیر”. عدليه قورومونون سؤزچوسو خانیم محمدی‌نین حبس‌خاناداکی ایفاده‌لری‌نین اونا مخصوص اولمادیغینی ادعا ائتسه ده، بو ایفاده‌لره گؤره عدليه نرگس محمدی باره‌سینده پرونده آچیب.
اینستاگرامدا نرگس محمدی‌یه عاید ائدیلن حساب، ائله‌جه ده خانیم محمدی‌نین فرانسادا یاشایان حیات یولداشی تقی رحمانی ایسلام جمهورییتی‌نین محکمه اورقانلاری‌نین بو ادعاسینا هله جاواب وئرمه‌ییب.
خانیم محمدی حبسده اولدوغو مدتده دفعه‌‌لرله حبس‌خانا داخیلیندن سانال اورتامدا مئساژلار یاییب و حتی خاریجی مئدیا ایله گیزلی یازیشمالار آپاریب. نرگس محمدی‌نین اینستاگرام حسابیندا ۲۸ آذرده اونون نوبل باریش اؤدولونو آلدیقدان سونرا اونون اوچون تشکیل ائدیلن ایلک محکمه ایجلاسیندا ایشتیراک ائتمه‌دیگینی بیلدیریب. بو محکمه هم ده حبس‌خانادا وئردیگی ایفاده‌لره گؤره اونا قارشی آچیلان اوچونجو پرونده اوزره کئچیریلیر.
#محبوسلار #نرگس_محمدی
