پرستو فریدی تبریز مرکزی حبس خاناسیندان سربست بیراخیلیب
تبریز بیلیم‌یوردونون صنایع موهندیسلیگی فاکولته‌سی‌نین اؤیرنجیسی پرستو فریدی محکمه‌یه قدر ۱ میلیارد ۲۰۰ میلیون تومن گیروو قارشیلیغیندا تبریزین مرکزی حبس‌خاناسیندان سربست بوراخیلیب.
بو واختا کیمی بو آذربایجانلی اؤیرنجی‌نین حبسی‌نین سببلری، مومکون اتهامی باره‌ده آیرینتیلی بیلگی یوخدور.
۲۰ یاشلی بو اؤیرنجی ۱۳ آبان ۱۴۰۲-ده سحر ساعتلاریندا تبریزده آتاسی‌نین ائوینده گوونلیک گوجلری طرفیندن حبس ائدیلمیشدی.
اونون حبسی زامانی گوونلیک امکداشلاری اونون بعضی شخصی اشیالارینی، او جومله‌‌‌دن موبیل تلفونو، لپ تاپ، فلش دیسکی و … موصادیره ائدیبلر.
ایسلام جمهورییتی‌نین گوونلیک گوجلری‌نین آذربایجانلی اؤیرنجیلره و مدنی فعاللارا تضییقلری کئچمیش آیلاردا دا داوام ائدیب. آیریجا ایرانین چئشیدلی بیلیم‌یوردلاریندا اعتراض ائدن اؤیرنجیلرین حبسی و فعالیتی‌نین دایاندیریلماسی خبرلری یاییلیب.
#آذربایجان_خبرلری #محبوسلار
