ذکیه ذولفقاری شرف آبادین‌له تانیش‌لیق (یازیچی،ترجمه‌چی )
۱۳۴۱-اینجی ایلده بیر پاییز گونو تبریزین چوسدوزولار محله‌سینده بیر دیندار و سنتی عائله‌ده دونیایا گوُز آچدیم.آتا-آنام بلکه‌ده بیر قیزلاری اولدوغونا گوُره، اوغلان گوُزلورموشلر. بونا رغما، عائله‌نین سون بئشیک و عزیزی اولدوم.
اوچ یاشیمدا مرنده کوُچندن بری، بوتون آجیلی-شیرینلی سوردوگوم گونلر دئتایلی ذهنیمده یازیلیب قالیب. اوشاقلیغیمدان آچیق گوُزله، هر بیر شئیه دیقت یئتیردیگیمه گوُره ذهنیمده دالبا-دال سوال‌لار یارانیردی. آما منطقی و قانع ائدیجی جوابلار آلمایینجا ماءیوس حالدا باخماقدان سونرا باشقا چاره‌م اولموردو.
ائومیزده قوران، نوحه کیتابی و مجتهد رساله‌سیندن سونرا باشقا بیر کتاب یوخودو. بو دورومدا عطش روحوم هاردان سو ایچه بیلردی؟
ایلک اوخودوغوم کتاب قوران اولدو. طبیعی عربجه.
ایلک مدرسه‌یه گئدن گونلریم بیر کابوس کیمی اینجه روحو پاران پارچا ائتدی.
بیر لال اوشاق غریبه دونیایا آیاق باسمیشدیم. آنجاق چوخ تئز غریبه دیلی اوُیرندیم.
ایکینجی، اوچونجو کیلاسی بیتیرندن سونرا فارس دیلینده اوخودوغوم کتاب‌ایسه آیت‌ا… شریعتمداری‌نین رساله‌سی اولوب. او رساله‌نی اوخویاندان سونرا روحوم بئینیم قاتما‌قاریشیق جوابسیز سواللارلا لاپ دول-بوشالدا اولدو.
اوشاقلیق چاغلاریمدا رساله‌نین احکام بولومونو اوخوماق، جینسی مسائلین حیوانی اوزونو آنلاماغین نه قدر تهلوکه‌لی اولدوغونو و سئل کیمی قارا دوشونجه‌لر و سورولار اوستومه آغناماغین تاثریندن یازماغی هله‌لیک واز کئچیرم.
بو سوال‌لارین بیرچوخو ایلل‌لردی یئنه جاوابسیز قالیب.
نه ایسه باجیم ۴ کیلاس مندن یوخاری اولدوغوندان اونون کتابلارینی اوندان اوُنجه من اوخویوب باشا وئرردیم.
و…باراما قوردو کیمی راستیما کئچن هر بیر یازیلی کاغاذ و کیتابی چئینیب اوداردیم.
آتام منیم اوخوماق ماراغیمی گوُرونجه الینه دوشن دینی کیتابلاری آلیب گتیریردی. چوخ تئز ایماملارین حیاتین و شهادتلرینی ازبر اولدوم و چوخ شیدتلی بیر دیندار قیز کیمی ثواب قازانماغا مشغول اولدوم!
اونلارین کناریندا، مدرسه‌لرده او زامانین اَلدن-اَله دولانان ر. اعتمادی‌نین عشقی رومانلاری و مجله‌لر گونده‌لیک خورکلریمیدی.
ایلک عشقی کتاب “ربکا” منده یئنی یئتمه غریزه‌لرینی اویاتسا دا مذهبی کتابلار بیزیم ائوده هر زامان اولویتده اولوبدور.
بیر آز یوخاری کیلاسلاردا ۵۷- انقلابینا یاخین ایللرده، شریعتی‌نین کتابلاری منه بیر نعمت ساییلیردی. سانکی ایتیردیگیمی اولاردا تاپیردیم.
“پدر مادر ما متهمیم” کتابی سانکی منیم دیلیمدن یازیلمیشدی.
فاطمه فاطمه است و …
آیت‌ا… طالقانی‌نین قرآن تفسیرلرینی آیه‌به آیه اوخویوب اسلاما یئنی بیر باخیشلا تانیش اولوردوم.
آنجاق کتاب آجی کیمی، الیمه دوشن هر پولی کتابا وئریب گئجه- گوندوز کاغاذلارلا عشق ائلیردیم.
گینه هئچ راضی دییلدیم، هئچ بیر کیتابلا قانع اولموردوم! نمنه آختاریردیم هئچ اوُزومده بیلمیردیم.
بو آختاریشدا باشیما‌چوخلو بلالر ده گلدی و بیر عوُمور ائو زیندانینا، اوشاق بوُیوتمگه محکوم اولدوم.
بو ایل‌لر گونده‌لیک‌لرین آز قالا رئکلاملارینی دا ازبرلیردیم. اوشاخلار کتابخانادان گتدیکلری کیتابلاری من اونلاردان اوُنجه اوخویوب بیتیریدیم.
پارلاق گونلریم وارلیق مجله‌سی ائومیزه گلن گوندن باشلادی.
آنا دیلیمده اوخوماق، او یازارلارلا تانیش اولماق اوزومه یئنی قاپی آچدی.
مرنده گلن تورکجه درگیلری ماراقلا اوخویوردوم و گون به گون آنا دیلیمی اوُرگشیب گلیشیردیم. قیزیملا اوغلوم منله آیاق اولوب ادبیات دونیاسیندا یئنی آددیملارلا ایره‌لی گئدیردیک.
مجازی دونیایلا تانیش اولماق منی اوچورتدو وفیسبوک‌دا ائل‌بیلیمی صحیفه‌سینده فعالیته باشلاماق و ادبیاتچی، فولکلورچو، شاعیرلره تانیش اولماق، اونلاردان درس آلماق، سرگردان خسته روحومو جانلاندیردیلار.
ائل‌بیلیمی‌نده اولان اوستادلار یولوما چیراغ اولدولار. ایلک یازیلاریم فولکلور و ناغیل لار ائل‌بیلیمی داخلی نشریه‌سینده چاپ اولدو. استاد صرافی جنابلارینین یاردیمی لا فولکو یازی یازدیم و سونرالار جرات تاپیب قادینلار حوضه‌سینده اولان کتابلاردان ترجمه‌یه باشلادیم.
چاپ اولونان اثرلر:
ترجمه‌لر:
“گولرکن بئله” قیسا ناغیلار (حتی وقتی میخندیم). یازار، فریبا وفی،چاپ ۱۳۹۵-جی ایل
دوغولمایان اوشاغا بیر مکتوب رومانی (نامه به کودکی که هرگز زاده نشد). یازار، اوریانا فالاچی.۱۳۹۵-جی ایل.
نادیره رومانی(سید جعفر پیشه‌وری).چاپ، ۱۴۰۰- جی ایل.
اولکه‌مین‌سیرلاری رومانی (رازهای سرزمین من) ایکی جلدده. تاسسوفله مجوویز وئرمیبلر.
تالیف:
سون قرار، قیسسا حیکایه‌لر توپلوسو. چاپ،۱۳۹۹-جی ایل.
کوچورمه‌لر:
قدیم تورکلر تاریخی، لئوگومولییف.چاپ، ۱۴۰۰-جی ایل.
دنیز کوچو، پوئیست. فیروز مصطفی. چاپ، ۱۳۹۸-جی ایل
عنقا قوشو رومانی. ائل‌اوجا آتالی. چاپ، ۱۴۰۱-جی ایل.
چوخلو کیچیک حیکایه‌لر، یازیلاریم دا مختلف مجله‌لرده، سایتلار و کانال‌لاردا یایلیبدیر.
