رشت ده حبس دالغاسی‌نین یئنی آیرینتیلاری
چارشنبه آخشامی، ۲۳ آباندا بیدارزنی سایتی رشتده مدنی فعاللارین حبس دالغاسی‌نین یئنی آیرینتیلارینی یاییب و حبس اولونانلار آراسیندا ایکی یازیچی و بیر حئیوان حوقوقلاری ساوونوجوسونون دا اولدوغونو بیلدیریب.
یاییلان بیلگیلره گؤره، آبان آیینین ۲۰-ده رشت شهرینده ایران ایسلام جمهورییتی‌نین گوونلیک گوجلری طرفیندن آزی ۲۰ قادین سیویل فعال حبس ائدیلیب.
بیدارزنی‌نین سؤزلرینه گؤره، ۲۰ آباندا رشتده حبس ائدیلنلردن بیری ده یازیچی و اصفهانداکی “اردیبهشت” کیتاب فئستیوالی‌نین حاکملریندن اولان رزیتا رجایی‌دیر.
آیریجا، رشتده یاشایان یازیچی نینا گلستانی ۲۰ آبان گونو اؤز ائوینده حبس ائدیلیب.
خانیم گلستانی یازیچیلیق کارییئرینده “ایکی حیصه‌‌‌لی اینسانلار”، “بو گئجه ملکله رقص ائدیرم” کیمی اثرلری اولان رشت شهری‌نین گنج یازارلارینداندیر.
آنا تهلوکه‌‌‌سیز ائوینین مودیری (یارالی حئیوانلارا دستک) آناهیتا حجازی ده ۲۰ آبان گونو حؤکومت گوجلری‌نین اونون ائوینه باسقین ائتدیگی زامان حبس ائدیلن رشتین باشقا مدنی فعاللاریندان بیریدیر.
بوندان اؤنجه ایران‌وایر خبر یایاراق ایکی ژورنالیست و چئوره فعالی نسیم طواف‌زاده و هلاله ناطقه، رشتده گوونلیک گوجلری طرفیندن حبس ائدیلدیگینی آچیقلامیشدی.
نسیم طواف‌زاده مرور خبر سایتی‌نین مودیری، هلاله ناطقه ایسه مرور خبر سایتیندا چئوره اوزره موخبیر اولاراق چالیشیر.
بو خبر یازیلانا قدر حبس ائدن قوروم و بو مدنی فعاللارا قارشی ایره‌لی سورولن اتهاملار باره‌ده هئچ بیر بیلگی یوخدور.
#ایران_خبرلری #محبوسلار
