آرمیتا گراوندین دفن مراسیمینده حبس ائدیلن ۱۴ قادینین تله‌سیک محکمهسی
آرمیتا گراوندین دفن مراسیمینده اونلارلا قادینین حبسیندن توپلام بیر هفته سونرا بو قادینلاردان ۱۴ نفری ۱۵ آبان ۱۴۰۲-ده موحاکیمه اولونماق اوچون تهران اینقیلاب محکمه‌‌سینه آپاریلدی.
آرمیتا گراوندین دفن مراسیمینده ده حبس ائدیلنلر آراسیندا نسرین ستوده ده وار ایدی و حوقوق ساوونوجوسو و خانیم ستوده‌نین حیات یولداشی رضا خندان ایران‌وایره بیلدیریب کی، بو ۱۴قادین تهران اینقیلاب محکمه‌‌سی‌نین ۲۶سایلی شؤبه‌سینه آپاریلیب.
جناب خندان بیلدیریب کی، حیات یولداشی نسرین ستوده بو ۱۴ نفر آراسیندا یوخدور و اونون پرونده‌سی اینقیلاب محکمه‌‌سی‌نین ۲۹-جو شؤبه‌سینه گؤندریلیب.
آرمیتا گراوندین دفن مراسیمینده حبس ائدیلن قادینلارین تله‌سیک محکمهسی حوقوق ساونوجولارینی ناراحات ائدیب و اونلار بو قادینلارین پرونده‌سی‌نین قروپ محکمه‌‌لرینده آراشدیریلاجاغیندان و حؤکم چیخاراجاغیندان قایغیلانیبلار.
بو ۱۴ قادین حبس اولوندوقدان توپلام بیر هفته سونرا محکمه‌‌یه گؤندریلیب، اونلار تقصیرلندیریلن شخصین اساس حوقوقلاریندان محروم ائدیلیبلر و ۸ آباندا دیندیرمه ایجلاسی کئچیریلیب.
بازار گونو، آبان آیینین ۷-ده آرمیتا گراوندین دفن مراسیمی ایران ایسلام جمهورییتی قوه‌لری‌نین موداخیله‌سی ایله زوراکیلیغا چئوریلدی و بو زامان ان آزی ۶۲ نفر حبس ائدیلدی، اونلاردان ۲۱نفری داها سونرا ورامین‌ین قرچک حبس‌خاناسینا کؤچورولدو.
تانینمیش حوقوق ساوونوجوسو و کئچمیش سیاسی محبوس نسرین ستوده بو محبوسلاردان بیریدیر کی، یاییلان بیلگیلره گؤره، “توپلاشماق و اؤلکه‌نین گوونلیگینی پوزماق نيّتی ایله ال بیر اولماق”، “رژیمه قارشی تبلیغات”، “توپلومسال دوزنی پوزماق” و “پولیس امرینه تابع اولماماق” کیمی اتهاملار اونا قارشی ایره‌لی سورولوب.
نسرین ستوده‌نین حیات یولداشی رضا خندان ۸ آباندا ایران‌وایره بیلدیریب کی، حیات یولداشی حبس اولوندوغو آندان آجلیق و درمان آکسییاسی کئچیریر.
#مجبوری_حجاب #آرمیتا_گراوند
