تبریزین قیزی آدی ایله تانینان رویا ذاکری اطلاعات ایداره سینه کؤچورولوب
تبریزین قیزی اولاراق تانینان و علی خامنه‌ای‌یه قارشی شوعارلار سسلندیرن تبریزلی گنج قادین رویا ذاکری حبس اولوناراق روحی خسته‌خانایا و داها سونرا باغشمالداکی تبریز اطلاعات ایداره‌سینه کؤچورولوب.
۲۹ مهر ۱۴۰۲-جی ایل شنبه گونو حوقوق‌شوناس “سینا یووسئفی” “ایکس” سوسیال شبکه‌سینده‌کی پایلاشیمیندا بو باره‌ده بیلگی پایلاشیب و یازیب: بو گون ساوجی‌نین امری ایله او، خسته‌خانادان باغشمالداکی تبریز اطلاعات ایداره‌سینه کؤچورولوب.
عینی زاماندا، آذربایجانلی تورک فعال دومان رادمهر ده اینستاگرامدا خانیم ذاکری‌نین تبریز اطلاعات ایداره‌سینه کؤچورولدویونو آچیقلاییب.
جناب رادمهر شنبه گئجه‌سی، ۲۹ مهر ده یازیب: بو آخشام، شنبه گونو، ۲۹ مهر گونو رویا ذاکری (تبریزین قیزی) رازی خسته‌خاناسیندان تبریز اطلاعات ایداره‌سینه کؤچورولدو.
بو تورک فعالین سؤزلرینه گؤره، رویانین آتا نصلی مرندین تانینمیش اینقیلاب کئشیکچیلری و بسیجی عائله‌‌‌لریندندیر. رویانین اوزون ایللر اؤنجه‌دن عائله‌‌‌سی ایله دوشونجه پروبلئملری وار.
۳۱ یاشلی رویا ذاکری بیلگی‌سایار علملری یوکسک لیسانس معزونودور. ۲۳ مهر ۱۴۰۲-ده تبریزین “منجم” محله‌‌‌سینده ” مجبوری حجابی اولمادان اورلدا ایدی کی امر به معروف مامورلاری‌نین هوجومونا معروض قالدی.
دوشدویو دورومدان یورغون و چاره‌سیز قالان بو گنج قادین ایسلام جمهورییتی‌نین لیدری علی خامنه‌ای‌یه قارشی شوعارلار سسلندیردیگی ویدئوسو سوسیال شبکه‌لرده مینلرله دفعه یاییلیب و تکرار یاییملانیب.
بو ویدئودا او، تورکجه دئییر کی حبس زامانی ۵ گون آجلیق آکسییاسی کئچیریب.
بوندان اؤنجه بیر خبرده خبر یایمیشدی کی، رویا ذاکری اؤتن ایل مهر آیینین سونلاریندا “قادین، حیات، آزادلیق” حرکاتی زامانی بیر آی حبسده ساخلانیب و حبس اولوندوغو ویدئودا دئدیگی کیمی ۵ گون آجلیق آکسییاسی کئچیریب. او، تبریز ملی بیلیم‌یوردونون قارشیسیندا گوونلیک گوجلری طرفیندن توتولاراق تبریز مرکزی حبس‌خاناسینا آپاریلمیشدی.ایرانین ان کؤتو بیلینن روحی خسته‌خانالاریندان بیری ایدی.
ایسلام جمهورییتی‌نین قوروملاری سون ایللرده اعتراضچیلاری و سیاسی محبوسلاری روحی خسته‌خانالارا کؤچورمکله، اونلاری آلچالتماق، سیخیشدیرماق، ایشگنجه وئرمک و حتی اؤلومه محکوم ائدیر.
#آذربایجان_خبرلری #رویا_ذاکری
