نازیلا معروفیان حیات تهلوکه‌‌‌سی سببیندن مجبوری اولاراق کؤچ ائدیب
سون بیر ایلده ۴ دفعه حبس اولونان ژورنالیست نازیلا معروفیان ایران ایسلام جمهورییتی‌نین اطلاعات ناظرلیگی‌نین اؤلوم تهدیدلری سونراسی فرانسایا موهاجیرت ائدیب.
دونن ۱۸ مهر ۱۴۰۲، چارشنبه آخشامی، خانیم معروفیان اینستاگرام صفحه‌‌‌سینده بیر ویدئودا بیلدیریب کی، سون دفعه حبسدن آزاد ائدیلدیکدن سونرا عائله‌‌‌سی ایله بیرلیکده خواجه عبدالله کوچه‌سینده یئرلشن اطلاعات ناظرلیگی‌نین بیناسینا چاغیریلیب. او بیلدیریب: اطلاعات مامورو آنامین گؤزلری‌نین ایچینه باخیب دئدی کی، سنین قیزینی اؤلدوره‌جکلر.
بیر گؤزونون اطرافینداکی مورلوقلارا دا توخونان بو ژورنالیست بونو دا دئییب: ۱۵ گون عراقدا سولیمانیه حبس‌خاناسیندا قالیب و اورادا دؤیولوب.
خانیم معروفیان، سون بیر ایلده چوخلو گوونلیک تضییقینه معروض قالدیغینی بیلدیردی و دئدی: منی تورپاغیمدان قوودولار. اینسان حاقلارینا ادعالی اولان بیر اؤلکه‌یه گلیب باشیما گلنلری، منیم کیمی اینسانلارا و یاشیدلاریمدان دانیشماق ایسته‌ییردیم.
نازیلا معروفیان ایلک دفعه اؤتن ایل ۸ آباندا مهسا امینی‌نین آتاسی امجد امینی ایله موصاحیبه‌نین یاییلماسی و ایشیقلاندیریلماسینا گؤره گوونلیک گوجلری طرفیندن حبس ائدیلمیش و اطلاعات ناظرلیگی‌نین نظارتی آلتیندا اوین حبس‌خاناسی‌نین ۲۰۹-جو بندینه کؤچورولموشدور و ۲۲ دی گونو کئچیجی اولاراق آزاد ائدیلیب. بو ایل شهریورین ایلک گونلرینده تهران اینقیلاب محکمه‌‌سی‌نین ۲۶-جی شؤبه‌سی اونو رژیمه قارشی تبلیغات آپارماق اتهامی ایله بیر ایل حبس و اون بئش میلیون تومن پول جزاسینا محکوم ائدیب.
