بیر نئچه ساعت اؤنجه نوبل اؤدول آکادمیسی‌نین تشکیلات کومیته‌سی‌نین آچیقلاماسی ایله حبسده اولان حوقوق ساوونوجوسو نرگس محمدی نوبل باریش اؤدولونو قازانیب.

نروژلی نوبل اؤدول آکادمیسی‌نین کاتیبی میکروفون آرخاسینا کئچدیکدن سونرا چیخیشینا فارسجا “قادین، حیات، آزادلیق” دئیه‌رک باشلاییب و داها سونرا نرگس محمدی‌نین نوبل باریش اؤدولونو آلماسی خبرینی آچیقلاییب. او بیلدیریب کی، “قادین، حیات، آزادلیق” شوعاری نرگس محمدی‌نین فعالیتینی دوزگون ایفاده ائدیر.

نرگس محمدی‌نین “ایراندا قادینلارا ائدیلن ظولمه قارشی، آزادلیق و اینسان حاقلاری‌نین تشویقی ایله موباریزه‌سی” آپاردیغی موباریزه‌نی نظره آلاراق نروژ نوبل آکادمیسی اؤز اؤدولونو بو حوقوق ساوونوجوسونا وئریب.

بوندان اؤنجه ۲۰۰۳-جو ایلده بو اؤدولو ایرانلی اینسان حاقلاری اؤزره وکیل خانیم شیرین عبادی قازانمیشدی.

بو ایلکی اؤدولون قالیبی اعلان اولونمازدان اؤنجه نرگس محمدی ایله یاناشی، اوکراینا جمهورباشقانی ولادیمیر زلنسکی‌نین، حبسده اولان روسیا موخالیفتی‌نین تانینمیش سیماسی الکسی ناوالنی و اولوسلار آراسی عدالت محکمه‌‌سی‌نین ده آدی مومکون آدایلار آراسیندا چکیلیب.
#قادین_حوقوقلاری #نرگس_محمدی