ایکی حادیثه شاهیدی آرمیتانین مترودا حیجاب قورویوجولاری طرفیندن وورولدوغونو تصدیقله ییب
تهران متروسوندا ۱۶ یاشلی اؤیرنجی قیز آرمیتا گراوندین حجاب قورویوجولاری طرفیندن وورولماسیندان ۴ گون سونرا گاردین قزئتی تهران متروسوندا حادثه‌‌‌نی گؤرن ایکی حادثه شاهیدی ایله دانیشا بیلیب.
حادثه شاهیدلریندن بیری گاردین قزئتینه بیلدیریب کی، حجاب قورویوجولار مترو واقونونا گیرن زامان حجابلی اولمادیغی اوچون آرمیتا گراوند ایله موباحیثه ائدیب. چادیرلی قادین قیشقیردی: “نییه حجابین یوخدو؟” و آرمیتا دا جاواب وئردی کی”من سینه دئییرم نییه چادرانی چیخارمیرسان؟” سونرا اونلارین موباحیثه‌سی شدتلندی و چادرالی قادین آرمیتایا هوجوم ائده‌رک اونو مؤحکم ایتله‌دی.
گاردین باشقا بیر شاهیده ایستناداً یازیب: آرمیتا یئره ییخیلاندا بئله هوشو باشیندا ایدی. آرمیتانی ایتله‌میش عینی قادین اونو خسته‌خانایا آپاران آمبولانسین قاپیسی‌نین آرخاسیندا دایانمیشدی.”
تهران ساکینی، ۱۶ یاشلی اؤیرنجی آرمیتا گراوند ۹ مهر گونو مترو واقونوندا هوشندان گئتدیکدن سونرا خسته‌خانایا آپاریلیب. اوچ گون سونرا ۱۲ مهرده “بِیین قاناماسی و کله سومویونون قاناخماسی” سببیندن قان تضییقی دوشمه‌سینه معروض قالیب و بو سببدن کومادادیر.
بوندان اؤنجه ایران اینسان حاقلاری تشکیلاتلاری‌نین راپورونا گؤره، آرمیتانین آناسی شهین احمدی گوونلیک گوجلری طرفیندن حبس ائدیلیب. اونون حبسی‌نین سببی ایله باغلی هله‌لیک هئچ بیر بیلگی یوخدور. اینقیلاب کئشیکچیلرینه یاخین تسنیم خبر آژانسی حبس خبرینی تکذیب ائدیب.
#عومومی_اعتراضلار #آرمیتا_گراوند
