«بیزیم ائو»!!!!!!! – اومای رادمهر
«بیزیم ائو»!!!!!!! (1)
گئرچکدن بونو هله ده ایشلهده بیلیرسیز ادبیاتیمیزدا؟ لوطفا جواب وئرمه یین کی بو بیر طنز یازیسیدیر!
بونون طنزی، شوخلوغو یوخدور. سانکی بیری «ترک خر» جوکو دئیه، سورا دئیه، ناراحت نشو بابا، جوکه، بخند!
ملی دئیرلریمیزه حساسیتیمیز اولدوغو قدر، جنسی کیملیگیمیزهده دئیر وئریب حساس اولمالییق. بیر یازارین گؤرَوی و مسئولیتی، توپلومدا بو مسئله لرین آلتیاپی و زیرسازی سینی ایشلمک دئییلمی؟
بیرطرفدن حایات یولداشی «بیزیم ائو» خطاب ائدیب، اونا اینسان کیمی دئییل، ائو کیمی، کیشینین مالکیتینده اولان اشیا اولاراق نقش و رول بیچیر، و یا ائو کیمی، بیر حریم شخصی اولاراق.
دیگر یاندان، قادینین هؤرومجک دن قورخوسونو ادبیاتدا قئید ائدرک، بو مسئله نی عادی سازی ائدیر.
و سون اولاراق، بو مسئله ایله شوخلوق ائتمک له، قادینی و قورخوسونو کیچیمسمک و یوخاریدان باخماق حیسی انساندا یارادیر.
تام بیر آتاارکیل و مردسالار بیر توپلومدا نرمال کلیشه لردیر بونلار، آما «ادبیات سئونلر» نئجه؟ یازار قشری نئجه؟
بس مسئولیتلریمیز و وجدان اجتماعی میز نه اولاجاق؟
منی یانلیش آنلامایین، من محکوم ائتمیرم، ساده جه نقد ائدیب، بیر چیرتما وورماق ایسته دیم.
بیرده بیز قادینلارین گؤزو ایله باخین ایسته دیم.
قادین هؤرومجک دن قورخور؟
بونونلا شوخلوق ائتمک یئرینه، عاجابا دوشونسک کی بونون ندنی نه اولا بیلر؟
بو قادینین سرشتینه باغلیدیر؟ یا توپلومون اونا بیچدیغی رولا و وئردیغی تربیت و آموزشه؟
چوخ اوزاغا گئتمیرم: شاهسئون ائللریمیزده اوبالاردا یاشایان قادینلاری دوشونون، اونلار هؤرونجک دن قورخورلار؟
البته کی یوخ! آما شهرده نازلی بؤیوتولن قادینلار نئجه؟
اونلار قورخورلارسا، باخین بؤیودوغو ائو و توپلومون اونلارین اوزرینده کی تربیته.
سیز قیزینیز و اوغلونوزلا آینی می رفتار ائدیرسیز؟
سس تونونوز آینی می اونلارلا؟
آلدیغینیز اویونجاق لار؟
گئییندیردیغینیز رنگ لر؟
سئچدیکلرینیز کارتونلار؟
اونلارین ذهنینده یئرلشدیردیغینیز دئیرلر؟
سیزین بو نازنازی بؤیوتدوغونوز قیزینیز، بؤیویوب بیر ائوین «بیزیم ائو»ی اولدوغوندا، هؤرومجک دن قورخاجاق و مسخره اولاجاق.
آما پیچگوشتی ، انبردست لرله، ماشینلار رباطلارلا بؤیوتدوغونوز اوغلانلارینیز هؤرومجک دن قورخماییب، و هؤرومجک دن قورخانه «بیزیم ائو»ینی ده مسخره ائدجک.
بونلار انسانین سرشتی دئییل، سنین، منیم، بیزیم و بیزدن تشکیل تاپان توپلوموموزون قوصورودور.
اومای رادمهر
