اردبیلده یاشایان بیر قروپ انگللی حؤکومت طرفیندن “انگللیلر حاقیندا” قانونون ۲۷-جی ماده‌‌سی‌نین ایجرا ائدیلمه‌مه‌سینه اعتراض اولاراق اعتراض آکسییاسی کئچیریب.
دونن ۲۲ مرداد ۱۴۰۲-جی ایل بازار گونو اردبیل شهریندن اولان بیر قروپ انگللی اللرینده پلاکاتلار توتاراق “انگللیلرین مودافیه‌سی حاقیندا” قانونون ۲۷-جی ماده‌‌سی‌نین حؤکومت طرفیندن حیاتا کئچیریلمه‌مه‌سینه اعتراض ائدیبلر.
“بیزسیز بیزیم اوچون قرار وئرمه‌یین”، “انگللی بئجریک‌سیز دئییل، عدالت برقرار دئییل”، “لاییقلی حیات آیریلماز حاقیمیزدیر”، “ظولم یئتر، سوفرمیز بوشدور”، “[گرک ‘ تصدیق اولونموش قانون حیاتا کئچیریلسین” و” انگللیلر حاقیندا قانونون ایجرا اولونماماسی اینسان اونورونون تحقیری و اؤلکه‌ده برابر حوقوقلارین آچیق شکیلده پوزولماسی حساب اولونور!” کیمی پلاکاتلاردا چاپ اولونموش و متنلر نومایش ائتدیریلیب.
۲۷-جی ماده‌‌یه گؤره، حؤکومت آغیر انگللی اولان و یا ایشی و گلیری اولمایان شخصلر اوچون مینیموم ایللیک امک‌حاقی مبلغینده یاشاییش اوچون مبلغ تعیین ائتمه‌یه و انگللیلری دستک‌له‌مک اوچون لازیمی وسایطی اؤلکه‌نین ایللیک بودجه قانونلارینا داخیل ائتمه‌یه یوکوملودور.
انگللیلرین فیکرینجه، ۱۳۹۶-جی ایلده تصدیق ائدیلمیش “انگللیلرین مودافیه‌سی حاقیندا” قانونون لازیمی ایجرا گارانتیسی یوخدور و بئش ایلدن آرتیقدیر کی، حؤکومت انگللیلری دستکلنمه‌سی ساحه‌‌‌سینده هئچ بیر ائتکیلی آدیم آتمییب و بونا باخمایاراق، حؤکومت، بو ایلین بودجه قانونوندا اؤزل بیر مبلغ ایچرن بو قانونون بودجه‌دن چیخاریب.
#آذربایجان_خبرلری #اردبیل
