مجبوری حجابا اعتراض ائدن محبوس قادین دؤیولوب و جینسی اذیته معروض قالیب
محبوسلارین خبرلرینی ایزله‌ین “ایران حبس‌خانالاری اطلسی”نین یازذیغینا گؤره اؤتن گونلرده دینی هیئت قارشیسیندا حجابسیز فوتوسو سوسیال شبکه‌لرده چوخلو تپکیلره سبب اولان قادینلاردان تبسم جمال‌پور ۲۶ تیر ۱۴۰۲-ده حبس اولوندوقدان و گوونلی ائو آدلانان مکانا کؤچورولدوکدن سونرا دؤیولوب و جینسی اذیته معروض قالیب.
ایران حبس‌خانالاری اطلسی‌نه بیر قایناغین وئردیگی بیلگیلره گؤره، تبسم جمال‌پور حبس ائتدیکدن سونرا گوونلیک مامورلاری اونا دئییبلر: یاییملادیغین شکیل کیمی چیلپاق اولمالیسان و سونرا زوراکیلیق و هوجوملا اونون پالتارینی چیخاریب سینه‌سینه توخونماغا چالیشیبلار.
بوندان اؤنجه دؤولت خبر آژانسلاری‌نین ادعاسینا گؤره، دینی سمبللاری تحقیر ائدن ایکی قادین و ایکی ارککین حبس اولونماسی خبرینی درج ائتمیشدیلر.
آدی آچیقلانمایان بو قایناغین سؤزلرینه گؤره، خانیم جمال‌پور اوین حبس‌خاناسی‌نین ۲۰۹-جو بندینه کؤچورولدوکدن سونرا آردیجیل بیر نئچه گون سورغو-سؤال ائدیلدی و چارشنبه آخشامی، ۳ مرداد گونو ائین قادین بندینه کؤچورولدو.
بو خبره گؤره، اونون اتهاملاری موقدسلری تحقیر ائتمک و فساد و فاحیشه‌‌‌لیگی یایماق آدلانیر. تبسم جمال‌پورون ۲۰ یاشی وار و او “قیرمیزی لاک” فیلمینده و “محکوملار” سریالیندا اویونچو اولاراق یئر آلیب.
اخلاق پولیسی‌نین نظارتینده اولان مهسا امینی‌نین قتلی‌نین ایل‌دؤنومو یاخینلاشدیغی بیر واختدا حؤکومت اعتراضچیلارا تضییقلری آرتیریب. گوونلیک اورقانلاری چوخلارینی حبس ائدیب، بیر نئچه‌سینه حبس جزاسی کیمی آغیر جزالار وئریب، لاکین بیر چوخ قیزلار و قادینلار حؤکومتین قاباغیندا دایاناراق توپلومدا حجابسیز گزیرلر.
#عومومی_اعتراضلار #مجبوری_حجاب
