شادی شهیدزاده ؛ ننه‌سی‌نین جسدی‌نین دورمونو ایزله‌دیگی اوچون ۵ ایل حبسه محکوم ائدیلیب
تهران اینقیلاب محکمه‌‌سی‌نین حاکمی ایمان افشاری‌نین باشچیلیق ائتدیگی ۲۶-جی شؤبه‌سی شادی شهیدزاده آدلی بهایی وطنداش اؤلکه‌نین گوونلیگینی پوزماق مقصدی ایله قئیری-قانونی قروپ و دسته‌لره عضو اولماق اتهامی ایله ۵ ایل حبسه محکوم ائدیلیب.
سؤزوگئدن اتهامین معناسی شادی شهیدزاده‌نین ایرانین بهایی ایجماسینا عضو اولماسی، باشقا سؤزله دئسک، بهایی اولماسی دیر. خانیم شهیدزاده‌نین باشقا اوچ بهایی وطنداشی ایله بیرلیکده محکمه ایجلاسی ۱۴۰۲-جی ایل خرداد آیینین ۱۰-دا تهران اینقیلاب محکمه‌‌سینده کئچیریلدی.
یئنی ایلین باشیندان بهشت زهرا هئچ بیر رسمی سند اولمادان وفات ائتمیش بهاییلرین جنازه‌لرینی تهرانین بهایی قبیریستانلیغیندا دفن اولونماق اوچون عائله‌‌‌لرینه بوراخماقدان ایمتینا ائدیب. بونا اساسلاناراق، بهشت زهرا یئتکیلیلری بیر سیرا مرحوم بهاییلری عائله‌‌‌سینه خبر وئرمه‌دن و دینی مراسیملر ایجرا ائتمه‌دن خاواران قبیریستانلیغیندا دفن ائدیبلر.
اؤلنلردن بیری شادی شهیدزاده‌نین ننه‌سیدیر. بو بهایی وطنداش پروبلئمی حل ائتمک و ننه‌سی‌نین میتینی تحویل آلماق اوچون موختلیف اورقانلارا موراجعت ائدرکن، بازار ائرته‌سی، ۱۱ اردیبهشت گونو اطلاعات ناظرلیگی‌نین امکداشلاری طرفیندن حبس ائدیله‌رک ۲۰۹-جو بنده آپاریلیب.
شادی شهیدزاده ایکی آیدان چوخدور کی، حبسده‌دیر و حاضردا اوین حبس‌خاناسی‌نین قادینلار بندینده‌دیر. شادی شهیدزاده‌نین آناسی اوچون چوخ داریخان بئش یاشلی اوشاغی وار.
#دینی_آزلیقلار #بهایی
