۱۵ یاشلی یئنی یئتمه سربست بیراخیلیدیقدان سونرا یئنیدن اطلاعات ایداره‌سینه چاغیریلیب
عومومی اعتراضلار زامانی اینقیلاب کئشیکچیلری اطلاعاتی حبس ائدیلن ۱۵ یاشلی يئنی‌یئتمه اعتراضچی امیر حسین رحیمی یئنیدن اطلاعات ایداره‌سینه چاغیریلیب.
اعتراضلار زامانی اینقیلاب کئشیکچیلری اطلاعاتی طرفیندن حبس ائدیلن و بیر مدت سونرا سربست بوراخیلان بو یئنی‌یئتمه‌نین آناسی الهام نجف اینستاگرام صفحه‌‌‌سینده بیر حکایه پایلاشاراق اوغلونون یئنیدن اطلاعاتا چاغیریلدیغینی آچیقلاییب.
خانیم نجف بو حکایه‌‌سینده یازیب کی، اطلاعات ایداره‌سیندن زنگ ائتدیلر، امیر حسینی چاغیردیلار و اونا ۲۴ ساعت واخت وئردیلر. او، یئنی‌یئتمه اوغلونون چاغیریلماسینی تنقید ائده‌رک یازیب: “دونیانین هاراسیندا یئتکینلیک یاشینا چاتمایان اوشاغی چاغیریرلار؟”
۱۵ یاشلی یئنی‌یئتمه امیرحسین رحیمی ۲۱ مهر ۱۴۰۱-ده فردیس‌ده گوونلیک گوجلری طرفیندن حبس ائدیلمیش و نهایت آذر آییندا کفالت قراری ایله سربست بوراخیلمیشدیر. بو یئنی‌یئتمه اعتراضچی حبس ائدیلرکن مامورلار طرفیندن ایشگنجه‌لره معروض قالیب و قولاغی‌نین ناغاراسینی جیریبلار. بوندان اؤنجه اعتماد آنلاین خبر آژانسی مامورلارین امیرحسین رحیمی‌نین باش و بویون ناحیه‌‌سی‌نین ایکس ری شکیللرینی درج ائده‌رک بو یئنی‌یئتمه‌یه آتش آچماسی خبری‌نین دوغرولوغونو تصدیقله‌میشدی.
#عومومی_اعتراضلار #امیرحسین_رحیمی
